ԱԺ նախկին փոխնախագահ Արա Սահակյանը համարում է, թե խորհրդարանական վերջին քաշքշուկները եւ ծաղրուծանակը եւս մի ապացույց էին, թե արատավոր է այն ճանապարհը, որ պետության կառուցման համար ընտրվել էր 1998-ի փետրվարին եւ, որ «ոչ քաղաքական միջավայրում չի կարելի քաղաքականություն իրականացնել»։ Պրն Սահակյանը նաեւ նկատեց. «Ցանկացած ապօրինի իշխանություն նաեւ անորակ իշխանություն է, որի հետ գործ ունենք այսօր»։
ԿԱՌԱՎԱՐԱԿԱՆ ՄԱԿԱՐԴԱԿ
ՀՀ կառավարությունից պաշտոնական գրությամբ արտգործնախարարությանը տեղեկացրել են, որ Մոսկվայում հրավիրվում է «Շրջապատող չորեքշաբթի» գիտաժողովը։ ԱԳՆ աշխատակիցները միահամուռ ջանքերով կարողացան հասկանալ, որ «Շրջապատող չորեքշաբթին» նույն «Շրջակա միջավայրն» է, ռուսերեն «Окружающая среда»-ի ուրույն թարգմանությունը։
Կարդացեք նաև
ԱԺՄ-Ն ՄԵԾ ԿՈՒՍԱԿՑՈՒԹՅՈՒՆ
«Մեծ կուսակցությունները չեն կարող այլեւս աշխատել քաղաքական էնտուզիազմով միայն»։ Արշակ Սադոյանն այսպես խոսեց եւ շարունակեց, թե ԱԺՄ-ն մեծ կուսակցություն է. «Հիմա պետք է կարգ ու կանոն եւ այնպիսի հատուկ ձեւակերպված սկզբունքներ, որ նրանցով ձեւակերպվի՝ ո՞վ էր ճիշտ, ով՝ սխալ»։ Եթե ԱԺՄ-ն այլեւս չի կարող էնտուզիազմով աշխատել, նշանակում է՝ կոնկրետ ակնկալիք ունի՞ վերջին քաղաքական շիլաշփոթից։
ՏԵՍՆԵՍ ԿՆԵՐՎԻ՞
«Մխիթար Սեբաստացի» կրթահամալիրի աշխատակիցների՝ ՀՀ նախագահի հրաժարականի պահանջը ստորագրել են նաեւ մեկ տասնյակից ավելի անցորդներ։ Նրանց միացել է նաեւ նախագահի ընդունարանի աշխատակիցներից մեկը, մասամբ, երեւի, ցրված, բայց եւ՝ «Եթե Բլեյանի համար է…,» պատրաստակամությամբ։
