ԹԱԼԱՆ՝ ՕՐԸ ՑԵՐԵԿՈՎ 2000-ի օգոստոսից «Միավորված բանկում» ինձ չեն տալիս ոչ իմ ավանդի գումարը, ոչ էլ նույնիսկ նախկին ամիսների (2000թ. հունվար-հուլիս) տոկոսները։ Իմ այն հարցին, թե երբ են վերադարձնելու իմ փողը, «Միավորված բանկի» ղեկավարությունը, արդեն մեկ տարուց ավելի, տալիս է նույն պատասխանը. «Ստույգ ոչինչ ասել չենք կարող»։ «Առավոտի» վերջին համարներից մեկում կարդացի «Միավորված բանկ» ԲԲԸ-ի «պատասխանը» ավանդատուների բողոքին։ Բանկի ղեկավարության խաբեության, կեղծ խոստումների քաղաքականությունը շարունակվում է։ «Պատասխանի» մեջ նորից նշված չէ որեւէ կոնկրետ ժամկետ։ Իսկ թե ինչ է նշանակում նրանց «մոտակա ժամանակը», ավանդատուները արդեն գիտեն։ «Պատասխանի» մեջ նրանք նշել են, որ իրենց պարտքը ավանդատուներին ոչ թե 15, այլ 2,3 մլն դոլար է։ Բայց ի՞նչ է դրանից փոխվում, եթե ավանդատուները, միեւնույն է, իրենց գումարը չեն ստանում։ Կողմնակալի եւ անպատասխանատու դիրք է զբաղեցրել այս հարցում նաեւ Կենտրոնական բանկի ղեկավարությունը։ Սակայն, քանի որ Կենտրոնական բանկը պարտավոր է վերահսկել բանկերի աշխատանքը եւ պատասխանատու է նրանց գործունեության համար, ես ուզում եմ դիմել Կենտրոնական բանկի նախագահ Տիգրան Սարգսյանին եւ «Միավորված բանկի» նախագահ Հովսեփ Գալստյանին հարցով, թե երբ եմ ես, վերջապես, ստանալու սեփական փողերս։ Վերադարձրե՛ք իմ փողը։ Հուսով եմ, որ վերոնշված պարոնայք խուլ ու համր չեն ձեւանա։ ՄԱՐԻՆԱ ՀԱԿՈԲՅԱՆ «Միավորված բանկի» ավանդատու
