Լրահոս
Օրվա լրահոսը

«Միշտ էլ կարողացել եմ հաց վաստակել»

Հոկտեմբեր 31,2007 00:00

Նախկին վարչապետ Հրանտ Բագրատյանը վստահեցնում է, որ պաշտոնն իր համար միայն աշխատավարձ է նշանակել:

– Պարոն Բագրատյան, ինչպե՞ս եք գնահատում Լեւոն Տեր-Պետրոսյանի առաջադրումը առաջիկա նախագահական ընտրություններում:

– Շատ դրական եմ գնահատում: Ես նրա առաջադրման կողմնակիցն եմ: Այդպիսով այսօր արդեն կարող ենք արձանագրել, որ ունենք այլընտրանք: Առանց նրա առաջադրման դա չկար: Ես չեմ ասում, որ առանց Տեր-Պետրոսյանի առաջադրման իշխանության թեկնածուն միանշանակ հաղթած էր: Ոչ: Բայց քանի որ այլընտրանք չկար, իշխանության խնդիրը տեխնիկական էր դառնում: Հիմա իշխանության խնդիրը միայն տեխնիկական չէ, նաեւ բովանդակային է:

– Հասարակության մեջ կարծրացած կարծիք կա, որ իշխանությունն ուժեղ է եւ նրան հնարավոր չէ հաղթել: Դա այդպե՞ս է:

– Ես չեմ կարողանում հասկանալ՝ ի՞նչ բան է ուժեղ իշխանություն: Կարող եմ հասկանալ «ընդունած օրենքներին հետեւող կամ չհետեւող իշխանություն», «իշխանությունը բռնազավթած իշխանություն», «հանցագործ իշխանություն» արտահայտությունները: Իշխանության ուժը ժողովուրդն է, եթե իշխանությունը ժողովրդավարական ձեւով ընտրված է: Ուժեղ իշխանություն՝ կնշանակի ուժեղ ժողովուրդ:

– Տեր-Պետրոսյանի վերադարձից դուք անձնական ակնկալիքներ ունե՞ք:

– Ես անձնական ակնկալիք չունեմ եւ Հայաստանում ես այն եզակի քաղաքական գործիչներից եմ, ով նաեւ իր ոլորտում համարվում է միջազգային մակարդակի արհեստավարժ: Այնպես որ, միշտ էլ կարողացել եմ հաց վաստակել եւ, որպես կանոն, ավելի շատ այն ժամանակ, երբ պաշտոնում չեմ եղել: Պաշտոնը մեզ համար նշանակում է միմիայն աշխատավարձ: Մենք դա ապացուցել ենք: Բայց եկեք «եթե»-ներով չխոսենք, առաջ նայենք:

– Դուք ասում եք, որ պաշտոնը ձեզ համար միայն աշխատավարձ էր, բայց այս տասը տարիների ընթացքում ամենաբարձր մակարդակներով անգամ անընդհատ ասվում էր, որ՝ «կերան, թալանեցին»: Դուք թալանե՞լ եք:

– Երբեք իմ անվան հետ թալան չեն կապել, ոչ ոք, անգամ ամենակատաղի ընդդիմախոսները:

– Հողի սեփականաշնորհումը…

– Հողի սեփականաշնորհումը ոչ ոք թալան չի համարել, համարել են սխալ: Ինչ վերաբերում է արդյունաբերության սեփականաշնորհմանը՝ դրա 85 տոկոսն արել են այս իշխանությունները: Մեր օրոք սեփականաշնորհվել են հողը եւ մանր խանութները, ու եթե դա չլիներ՝ տասնյակ հազարավոր մանր խանութպաններ չէինք ունենա, ովքեր այսօր հաջողությամբ, կամաց-կամաց դուրս են մղվում «Սթար», «ՍԱՍ» եւ այլ գրուպ-ների կողմից, որոնք անմիջական առնչություններ ունեն իշխանությունների հետ: Գալով թալանի տրամադրվածությանն ու հոգեբանությանը՝ ես չեմ կարծում, որ նման բան կա ժողովրդի մոտ: Դա իշխանությունների մոտ է եւ եղել է իշխանությունը վերցնելուց ի վեր: Նման հոգեբանությունը ձեւավորելուն նպաստել է նաեւ այն, որ իրենք դրանով զբաղված են եղել: Ոմանք նույնիսկ ունեն իշխանության հենց այդպիսի ընկալում, իշխանության լինել՝ նշանակում է թալանել:

Եվ ՀՀ հիմնադիր նախագահը, եւ ես այն հազվագյուտ քաղաքական գործիչներից ենք, ովքեր արդեն եղել են իշխանության մեջ եւ հեռացել են մաքուր: Մեր իշխանությունից անցել է 10-12 տարի. մեզանից ոչ ոք ոչ մի բանում չի մեղադրվել: Չկա Հայաստանում ուրիշ քաղաքական գործիչ, ով երկար տարիներ, սիստեմատիկաբար եղել է իշխանության մեջ եւ մաքուր է մնացել: Այսօրվա իշխանությունում կամ ընդդիմությունում այդպիսի մեկ-երկուսը չկան: Այսինքն՝ մաքրությունից կարող է խոսել այն մարդը, ով արդեն եղել է իշխանություն, հեռացել է, անցել են տարիներ եւ ոչ մի բանում չի մեղադրվել: Չեմ ուզում սրբացնել մեր գործելակերպը, բայց վերցնելով, մասնավորապես, իմ կառավարությունը՝ անդամներից չկա մեկը, ով այսօր օլիգարխ է:

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հոկտեմբեր 2007
Երկ Երե Չոր Հնգ Ուրբ Շաբ Կիր
« Սեպ   Նոյ »
1234567
891011121314
15161718192021
22232425262728
293031