Միջին քաշային կարգում տարբեր վարկածներով աշխարհի չեմպիոններ Արթուր Աբրահամի եւ Կելլի Պավլիկի միջեւ գոտիների միավորման մենամարտ կազմակերպելու մասին խոսակցությունները վաղուց են շրջանառվում:
Երկու բռնցքամարտիկների պրոումոթերներն արդեն խոստանում են, որ չեմպիոնների միջեւ այդքան սպասված մենամարտը կարող է կայանալ նոյեմբերի 7-ին՝ Նյու Յորքի հանրահայտ «Մեդիսոն Սկվեր Գարդենում»: Համենայնդեպս, կողմերի իրավաբաններն արդեն ձեռնամուխ են եղել պայմանագրի տեքստի կազմմանը:
Սակայն մինչ այդ, WBC/WBO վարկածներով աշխարհի չեմպիոն Պավլիկը դեռ պետք է գոտիները պաշտպանի առաջին միջին քաշային կարգում աշխարհի նախկին չեմպիոն Սերխիո Մորայի, իսկ IBF-ի չեմպիոն Աբրահամը՝ պարտադիր հավակնորդ Ջովաննի Լորենցոյի հետ: Եվ եթե դա նրանց հաջողվի եւ չեմպիոնները լուրջ վնասվածքներ չունենան, նրանք հաջորդ անգամ միասին ռինգ կմտնեն:
Ավելացնենք, որ այստեղ էլ հաջողության հասնելու դեպքում քաշը պահպանելու խնդիրներ ունեցող Աբրահամը մտադիր է տեղափոխվել երկրորդ միջին քաշ:
