Արտասահմանյան մի շարք երկրներում ոսկերչության եւ ադամանդագործության ոլորտներում առաջատար հայկական մասնավոր ընկերությունների մի քանի սեփականատերեր եւ Համաշխարհային հայ ոսկեգործների միության անդամները երեկ վարչապետ Տիգրան Սարգսյանի հետ հանդիպման ժամանակ քննարկել են մեր երկրում ոսկերչության եւ ադամանդագործության ներկա վիճակը: Տ. Սարգսյանի խոսքերով, ներկայիս ֆինանսատնտեսական ճգնաժամի պայմաններում շատ կարեւոր է հայրենիքի եւ Սփյուռքի գործարարների ջանքերի համատեղումը:
Արտերկրի հայ գործարարները առաջարկել են Հայաստանում ստեղծել հիմնադրամ՝ ոսկեգործության, ադամանդագործության, ժամագործության, մարկետինգի բնագավառներում որակյալ կադրերի պատրաստման եւ աշխարհին ներկայացնելու նպատակով: Ոլորտի խոշորագույն հայկական ընկերությունների ղեկավարները նշել են, որ այդ ծրագրերի իրականացումը հնարավորություն կտա Հայաստանը դարձնելու ոսկեգործության, ադամանդագործության եւ ժամագործության միջազգային կենտրոն եւ ապահովել հազարավոր աշխատատեղեր:
Վարչապետն էլ հավաստիացրել է, որ նշված առաջարկությունների մի մասի իրականացման համար կօգտագործվեն Գյումրիի տեխնոպարկի հնարավորությունները, բացի այդ, կառավարությունը կաջակցի ոլորտի զարգացմանն ուղղված բոլոր կառուցողական նախաձեռնություններին, նախագծերին ու ծրագրերին:
