ԴԻԱԿԸ՝ ԼՃՈՒՄ
Արմավիրի մարզային փրկարարական վարչության փրկարար ջոկատը լճից դուրս է բերել Հոկտեմբեր գյուղի 15-ամյա բնակիչ Կարեն Սարգսյանի դին:
«ԲԵԼԱՋԻՈՅԻ» ՔԱՐԵՐԸ՝ ԻՐԱԿԱՆ ՎՏԱՆԳ
Երեւանի ճանապարհային ոստիկանությունից տեղեկություն էր ստացվել, որ Մյասնիկյան պողոտայում՝ «Բելաջիո» ռեստորանին հարակից տարածքում, տեղի է ունեցել քարաթափում: Մյասնիկյան պողոտայի երթեւեկելի մասում ընկել էր մեկ, իսկ հետիոտնային հատվածում՝ մի քանի քարաբեկոր:
ՕՁԸ ԽԱՅԹԵԼ ԷՐ
Օձի խայթոցով Արագածոտնի մարզի Աշտարակի հիվանդանոց է տեղափոխվել Ոսկեվազ գյուղի 69-ամյա բնակիչ Թելման Թովմասյանը:
ՄԵՔԵՆԱՆ՝ ՁՈՐՈՒՄ
Լոռու մարզի Ձորագետն էր ընկել «ՎԱԶ-2121» մակնիշի 36 ՏԼ 700 պետհամարանիշի ավտոմեքենան: Տուժածներ չկան:
ՇՄՈԼ ԳԱԶԻՑ
Ըստ ԱԻՆ փրկարար ծառայության, գազից թունավորումով Արագածոտնի մարզի Թալինի հիվանդանոց է տեղափոխվել նույն քաղաքի 21-ամյա բնակչուհի Սեդա Գրիգորյանը: Տուժածի վիճակը գնահատվում է կայուն ծանր:
ՀԱՋՈՐԴԸ Ո՞Վ ԿԼԻՆԻ
«Առավոտի» տեղեկություններով, ՀՀ մշակույթի նախարարի նախաձեռնությամբ առաջիկայում լայնամասշտաբ ստուգումներ կիրականացվեն Հայաստանի պետական պատկերասրահում: Այն անցյալ դարի 60-ական թվականներից հետո չի ստուգվել:
Մեր աղբյուրի փոխանցմամբ, նախարարը հանձնարարական տալուց առաջ կասկած է հայտնել, որ պատկերասրահում կան նկարներ, որոնք բնօրինակ չեն: Իր առաջին քայլը նախարարը սկսեց Հրազդանի մասնաճյուղից, որտեղից 18 գեղանկար էր գողացվել՝ ոչ պատահականորեն: Առայժմ մեղադրանք է առաջադրվել մասնաճյուղի տնօրենի դեմ, եւ աշխատանքից ազատվել է մշակույթի փոխնախարար Գագիկ Գյուրջյանը:
ՆՈՏԱՐՆԵՐԸ ԿԳՆԱՆ ՔՆՆՈՒԹՅԱՆ
Երեկ արդարադատության նախարարի մամուլի քարտուղար Լանա Մշեցյանն «Առավոտին» տեղեկացրեց, որ հուլիսի 1-ին, ժամը 10-17-ը ՀՀ արդարադատության նախարարության շենքում (Հալաբյան 41/ա) տեղի կունենան նոտարի թեկնածուների քննություններ: Քննության ընթացքին կհետեւի քննական հանձնաժողովը՝ արդարադատության նախարարի առաջին տեղակալ Գեւորգ Մալխասյանի ղեկավարությամբ:
Մասնակիցների թիվը 15-ն է: Քննությունը հաղթահարածները գրանցվում են նոտարների պիտանիության ցուցակում եւ թափուր տեղ առաջանալու դեպքում կարող են զբաղեցնել տվյալ պաշտոնը:
ԲՌՆԵԼ ԵՆ ՕՐԵՆՔՈՎ ԳՈՂ
Մոսկվայում «Փախլավա» կոչվող ռեստորանում երկու օր առաջ ձերբակալվել է ԱՊՀ երկրներում ընդունված 48-ամյա օրենքով գող Կամո Սաֆարյանը: Իրավապահները նրա մոտից հայտնաբերել են 11 գրամ հաշիշ:
