Միացյալ Նահանգների գաղտնի ծառայությունը հետաքննում է Facebook ցանցում հրապարակված հանրային կարծիքի ուսումնասիրությունը՝ պե՞տք է սպանել նախագահ Օբամային հարցադրմամբ: «BBC»-ի մատուցմամբ, այդ հարցման արդյունքները համացանցում հայտնվել էին շաբաթ օրը եւ անմիջապես հանվել, երբ կայքի ադմինիստրացիան իմացել էր դրա մասին:
Հրապարակումը ցանցում տեղադրվել էր կայքի հետ կապ չունեցող կողմնակի ծրագրի օգնությամբ: Հարցումը, որը Facebook-ի ղեկավարները գնահատել են վիրավորական, պարունակել է հետեւյալ հարցը՝ պե՞տք է, արդյոք, սպանել նախագահ Օբամային, եւ առաջարկել է հնարավոր չորս պատասխան՝ «ոչ», «հնարավոր է», «այո» եւ «այո, եթե կրճատի իմ բուժսպասարկումը»:
Որպես պետության ղեկավարին սպառնացող ցանկացած վտանգ, այս հարցումը եւս հետաքրքրել էր ԱՄՆ գաղտնի ծառայությանը, որը ի պաշտոնե ապահովում է երկրի նախագահի անվտանգությունը: Ծառայության ներկայացուցիչ Դարրին Բլեքֆորդը խոստացել է անհրաժեշտ միջոցներ ձեռնարկել տեղի ունեցածը հետաքննելու համար: «Մենք նման բաները լուրջ ենք ընդունում»,- ասել է Բլեքֆորդը: Facebook-ն իր հերթին խոստացել է համագործակցել հետաքննական մարմնի հետ: Թե ինչպիսին են եղել հարցման արդյունքները՝ «BBC»-ն չի մանրամասնել:
