Օրերս Շվեյցարիայի Ֆրիբուր կանտոնի Գրյուեր դղյակի թանգարանում բացվել է «Նեապոլյան Սուրբ Ծնունդ» ցուցահանդեսը, որտեղ ներկայացված են XVIII-XX դարերում իտալացի վարպետների պատրաստած՝ Սուրբ Ծնունդը պատկերող տեսարաններ: Դղյակը կառուցվել է 1270-1282 թվականներին, իսկ 1938թ. կանտոնը գնել է դղյակը տերերից եւ դարձրել թանգարան:
Ցուցադրված նմուշները պատկերում են Քրիստոսի Սբ Ծննդյան օրվա տոնական մթնոլորտը: Նեապոլցի վարպետներին հաջողվել է հմտորեն արտահայտել շքեղ հագուստներով ճենապակե տիկնիկների արտահայտիչ դիմախաղը եւ ժեստերը: Սբ Ծննդյան մսուրի յուրօրինակ նմուշները, ըստ qahana.am-ի, Շվեյցարիա են բերվել Նեապոլի պատմական կենտրնում գտնվող Սբ Գրիգոր հայկական եկեղեցու հայտնի հավաքածուից:
