Զբաղվածության խնդիրը մեր հանրապետության ամենակարեւոր հիմնախնդիրներից մեկն է: Գործազրկության թիվը հասնում է հազարների, ինչի հետեւանքով մեր քաղաքացիները լքում են երկիրը: Նրանց շարքում մեծ թիվ են կազմում հատկապես երիտասարդները, ովքեր ավարտելով կրթական հաստատությունները, չեն կարողանում հարմար աշխատանք գտնել: Մեր հանրապետությունում շուրջ 22 000 երիտասարդ այսօր զբաղվածության խնդիր ունի: Սա էր հիմնական պատճառը, որ օրերս Եվրոպական ուսանողների ֆորումը՝ AEGEE-Yerevan-ը, «Կոնգրես» հյուրանոցում իրականացրեց մեկօրյա դասընթաց՝ նվիրված երիտասարդների գործազրկությանը եւ նրանց զբաղվածության հիմնախնդրին: Դասընթացի ընթացքում մասնակիցները ծանոթացան հաջողակ ինքնակենսագրական եւ ուղեկցող նամակ գրելու հմտություններին, սովորեցին, թե ինչպես նախապատրաստվել գործատուի հետ հարցազրույցին, ինչպես նաեւ տեղեկացվեցին տարբեր աշխատանքային, կրթական եւ կամավորական հնարավորությունների մասին:
Դասընթացին մասնակցեցին ներկայացուցիչներ Երիտասարդների մասնագիտական կողմնորոշման կենտրոնից, Գերմանական ակադեմիական փոխանակման ծառայությունից (DAAD), Միջազգային հետազոտությունների եւ փոխանակման խորհրդից (IREX), Erasmus Mundus փոխանակման ծրագրից եւ այլ կազմակերպություններից:
Դասընթացին մասնակցեց 200 երիտասարդ՝ տարբեր բուհերից: