ԱՄՆ նախագահ Բարաք Օբաման գաղտնի կարգադրություն է ստորագրել Լիբիայում ԱՄՆ բանակի գաղտնի գործողություն սկսելու վերաբերյալ: Գործողությունն ուղղված է ապստամբների աջակցությանը՝ Մուամմար Քադդաֆիի հետ պայքարում: Այդ մասին հայտնում է panarmneian.net-ը՝ հղում անելով ABC News-ին:
Ըստ աղբյուրի, կարգադրության մեջ կան կետեր, որոնք թույլ են տալիս անկանխատեսելի հանգամանքների դեպքում Քադդաֆիի հակառակորդներին զենք մատակարարել, սակայն հրահանգը չի պարունակում այս փուլում զենքն ապստամբներին հանձնելու վերաբերյալ գործողություն:
Սպիտակ տան ներկայացուցիչները հրաժարվել են մեկնաբանել այս տեղեկությունները՝ վկայակոչելով տվյալների գաղտնի բնույթը: «Ապստամբներին զենք մատակարարելու մասին որոշում չի ընդունվել: Մենք չենք բացառում, սակայն չենք էլ հաստատում այդ հնարավորությունը: Մենք գնահատում եւ դիտարկում ենք Լիբիայի ժողովրդին աջակցելու բոլոր տարբերակները»,- ասվում է Օբամայի ներկայացուցիչների հայտարարության մեջ: Մինչդեռ հայտնի է դարձել, որ սենատոր-հանրապետական Ռենդ Փոլը նախաձեռնել է ԱՄՆ Սահմանադրությանը Լիբիայում ռազմական գործողության համապատասխանության քննարկում:
Բանավեճի արդյունքում Սենատը կարող է փաստաթուղթ ընդունել՝ նախագահի կողմից իր լիազորությունների չարաշահման մասին:
