Մի քանի մարդ զոհվել եւ մի քանիսը վիրավորվել է Աֆղանստանի ռազմաօդային ուժերի օդաչուի եւ Քաբուլի օդանավակայանում կոալիցիոն ուժերի զինվորների միջեւ տեղի ունեցած փոխհրաձգության արդյունքում: Reuters-ի փոխանցմամբ, այդ մասին հաղորդել է Աֆղանստանի պաշտպանության նախարարությունը:
Տեղի ունեցածի մանրամասները հայտնի չեն: Քաբուլում կոալիցիոն ուժերի ներկայացուցիչը հաստատել է, որ օդանավակայանում հրաձգություն է եղել, բայցեւ հրաժարվել է մանրամասներ հաղորդել:
Աղբյուրի մատուցմամբ, օդանավակայանում հրաձգությունը հետեւել է անվտանգության աֆղանական ուժերի կողմից ՆԱՏՕ-ի իրենց հովանավորների դեմ իրականացված հարձակումների շարքին: Այդ հարձակումներն իրականացրել էին կամ զինվորականների վերահսկողությունից դուրս եկած մարդիկ, կամ ապստամբները, որոնք հաջողացրել էին ներդրվել աֆղանական ուժային կառույցներում եւ զինվորական համազգեստներ էին ստացել:
Հիշեցնենք, որ մոտ ժամանակներս մեկնարկում է ԱՄՆ հրամանատարության ներքո գործող օտարերկրյա զորքերի դուրսբերումը Աֆղանստանից, ուր վերջիններս տեղակայված են 2001թ. աշնանից ի վեր՝ այդ երկրում թալիբների ռեժիմը տապալելու եւ ահաբեկչության դեմ պայքարելու նպատակով: Զորքերի դուրսբերման առաջին փուլում կոալիցիոն ուժերը կմնան երկրի միայն մի քանի շրջաններում, իսկ 2014-ի վերջին երկրի ողջ տարածքում վերահսկողությունը կստանձնեն Աֆղանստանի իշխանությունները:
