«Դե ֆակտո» հասարակական-քաղաքական ամսագիրն անցնող տարվա Հայաստանի «Տարվա մարդ» ճանաչել է ֆուտբոլի Հայաստանի ազգային հավաքականի կիսապաշտպան Հենրիխ Մխիթարյանին, իսկ «Տարվա լավագույն մարզիկ` հունահռոմեական ըմբիշ, Եվրոպայի չեմպիոն Ռոման Ամոյանին:
Ամսագրի ղեկավարությունը մարզական հերոսների համար սահմանված հատուկ մրցանակները հանձնեց «Էրեբունի» բիզնես կենտրոնում, որից հետո հրավիրվեց համատեղ մամուլի ասուլիս:
Ռոման Ամոյանն անցնող մրցաշրջանն իր համար գնահատեց եւ լավ, եւ վատ: Լավ, քանի որ ոչ միայն Գերմանիայում նվաճեց Եվրոպայի չեմպիոնի կոչումը, այլեւ ճանաչվեց հունահռոմեական ոճի Եվրոպայի լավագույն ըմբիշ: Իսկ վատ, որովհետեւ Ստամբուլում անցկացված աշխարհի առաջնությունում իրեն չհաջողվեց ոչ մրցանակային տեղ զբաղեցնել, ոչ էլ Հայաստանի համար օլիմպիական ուղեգիր նվաճել, թեեւ անհաջող հանդես գալու պատճառն առողջությունն էր: Սակայն ըմբիշը հավաստիացրեց, որ ամեն ինչ դեռ առջեւում է եւ եկող տարի դեռ երեք վարկանիշային մրցաշար կա եւ ինքն անելու է ամեն բան` ուղեգիր նվաճելու համար:
Իր հերթին Հենրիխ Մխիթարյանը մրցաշրջան 2011-ը ֆուտբոլի Հայաստանի ազգային հավաքականի համար հաջողված համարեց: Ու, չնայած, Իռլանդիայից կրած անարդար պարտության պատճառով հավաքականը զրկվեց Եվրո 2012-ի եզրափակչի համար պայքարելու իրավունքից, սակայն, ֆուտբոլիստի համոզմամբ՝ 2011-ը հայկական ֆուտբոլի համար առաջընթացի տարի էր: Հայաստանի լավագույն ֆուտբոլիստը նույնպես խոստացավ, որ հավաքականը եկող մրցաշրջանում անելու է ամեն բան՝ աշխարհի առաջնության ընտրական մրցաշարում ավելի լավ հանդես գալու, հաջողությունները զարգացնելու եւ հայկական ֆուտբոլի միջազգային հեղինակությունն ավելի բարձրացնելու համար:
Կարդացեք նաև
Աշոտ ՀԱԿՈԲՅԱՆ
