ԵԽԽՎ Հայաստանի հարցով համազեկուցող Ջոն Պրեսկոտի Երեւան կատարած այցի վերաբերյալ տեղեկատվական հաղորդման մեջ, որը քննարկվեց Մոնիթորինգի հանձնաժողովի վերջին նիստում՝ անդրադարձ կա դատական համակարգի եւ ոստիկանության բարեփոխումներին: Մասնավորապես նշված է, թե ոստիկանական համակարգում կոռուպցիան մնում է մտահոգության առարկա: Հիշատակված է, որ Վեհաժողովը բազմիցս առաջարկել է, որ ոստիկանության նկատմամբ լինի իրապես քաղաքացիական վերահսկողություն, ու նաեւ, որ իր վերջին բանաձեւում ԵԽԽՎ-ն կոչ էր արել Հայաստանի իշխանություններին ստեղծել նախարարություն, որի ենթակայության ներքո կլինեն ոստիկանությունը եւ անվտանգության ուժերը: «Իշխանությունները նշեցին, որ իրենք պատրաստ են անդրադառնալ այդ առաջարկություններին,- նշված է փաստաթղթում ու մանրամասնած, թե իրենց տեղեկացրել են, որ նման փոփոխությունները պետք է կարգավորվեն օրենքով:- Այս օրենքը նախատեսվում է փոխել, երբ մայիսին կայանալիք Հայաստանի խորհրդարանական ընտրություններից հետո կկազմավորվի նոր կառավարություն»:
ԵԽԽՎ համազեկուցողները նաեւ պնդում են, թե պետք է ստեղծվի մեխանիզմ, որն անկախ կերպով կհետաքննի ոստիկանությանն առնչվող բողոքներն ու մեղադրանքները. «Նման մեխանիզմի առաջարկ պատրաստվել է իշխանությունների կողմից եւ ուղարկվել է Եվրոպայի խորհրդին՝ կարծիքի համար»: Եվ էլի հայտնել են, թե իշխանությունները նպատակահարմար չեն գտնում այս մեխանիզմն իրականացնել այս պահին, սակայն խոստացել են, որ դա կարվի մինչեւ 2012 թ ամառը:
