Ինչպես տեղեկացրել ենք, անցած ուրբաթ երկու մականունավոր երիտասարդներ`ԲՀԿ-ի համար աշխատող «Շեկոն»` Արտյոմ Կարապետյանը, ու ՀՀԿ-ական «Տանկը»` Հովհաննես Մկրտչյանը, ծեծկռտուք էին սարքել Գյումրու Ռեպինի փողոցում գտնվող սպորտդպրոցում, որի առթիվ էլ հենց հաջորդ օրը Շիրակի մարզի քննչական բաժնում հարուցվել էր քրեական գործ` ՀՀ Քր. Օր.-ի 258-րդ հոդվածի 3-րդ մասի 1-ին կետի հատկանիշներով, այն է` մի խումբ անձանց կամ կազմակերպված խմբի կողմից խուլիգանություն կատարելը: Սակայն նշենք, որ մինչ օրս մարզի իրավապահներին չի հաջողվել հայտնաբերել ռազբորկայի հերոսներին` թե սպորտդպրոց ներխուժած ու տնօրենի վրա հարձակում գործած «Շեկոյին» և թե ծեծված «Տանկին»: Մեր տեղեկություններով, միակ անձը, ով վկայություն է տվել այս գործով, սպորտդպրոցի հավաքարարն է, մնացածը իբրև թե ոչ տեսել են, ոչ էլ լսել:
Հետաքրքիրն այն է, որ Գյումրիից անհետացել է ոչ միայն «Շեկոն»` իր երկու ընկերներով, այլ նաև տուժողը` մարզադպրոցի ղեկավար Հովհաննես Մկրտչյանը` նույն ինքը «Տանկը»: Իրավապահների փոխանցելով, «Շեկոն» նախկինում գողությունների համար դատված է եղել, նա ԱԺ ԲՀԿ-ական պատգամավոր Մարտուն Գրիգորյանի սպանված հորեղբոր` Սերոբ Գրիգորյանի թիկնազորից է եղել,ու նրա մահից հետո Գրիգորյանների գերդաստանի հետ պահպանել է իր ջերմ հարաբերությունները: Իրավապահների բնութագրելով, իր վարքագծով չի փայլել նաև սպորտսմեն «Տանկը», ով նույնպես անընդհատ պատերազմների մեջ է եղել: Հիշեցնենք, որ վերջինս էլ Գյումրու քաղաքապետի որդու շրջապատից է:
Նունե ԱՐԵՎՇԱՏՅԱՆ
