Aravot.am-ը Գյումրու քաղաքապետարանի աշխատակազմի ղեկավար, ՀՀԿ-ական Բորիս Ալեքսանովից հետաքրքրվեց, թե որպես փորձառու կուսակցական ու պետական գործիչ ի՞նչ կարծիքի է` ՀԱԿ-ը քանի՞ տոկոս կզբաղեցնի ապագա խորհրդարանում: «Շատ ծեծված խոսք է, ասում են գուշակումներ անելը անշնորհակալ զբաղմունք է, բայց իմ կարծիքով ՀԱԿ-ը կմտնի Ազգային ժողով, և իմ կարծիքով ցանկալի է , որ մտնի: Գիտեք մի բան է` ոչինչ չանելով խոսել, մի այլ բան է` պատասխանատվություն կրելով խոսել, դրա համար ես շահագրգռված եմ, որ իրենք էլ անպայման մտնեն Ազգային ժողով, մի քիչ էլ իրենք զգան իրենց ուսերին պատասխանատվություն: Թող դատարկաբանությամբ զբաղվելու փոխարեն գան գործ անեն ու ապացուցեն, ասեն` մենք ունենք էսքան պատգամավոր, սա նրանց ձեռնարկած գործերը, Հանրապետական կուսակցությունն էլ ունի էսքան պատգամավոր և ոչ մի բան չեն արել, ապացուցեն մեր չանելը ու ապացուցեն իրենց արած գործերը, ես ընդամենը ուրախ կլինեմ ու կողջունեմ»,-ասաց պաշտոնյան:
Մեր զրուցակիցը վստահեցնում է, որ ընտրակաշառքը հենց Լևոն Տեր-Պետրոսյանի շրջապատից է դուրս եկել, և որ այն Հայաստանում սերմանել են այնպիսի մարդիկ, որոնք այսօր պատգամավորի թեկնածուներ են, տեղ են զբաղեցնում ՀԱԿ-ի համամասնական ցուցակում:Մեր այն հարցին, թե կոնկրետ ովքե՞ր են ընտրակաշառքի հիմնադիր հայրերը և ի՞նչ տեսքով են բաժանել` փողի՞, Բորիս Ալեքսանովը պատասխանեց.«Ամեն ինչի տեսքով` ե՛ւ պաշտոն տալու, ե՛ւ փողի, բա էսքան գործարանները` մեր հանրային սեփականությունը, որ չնչին գներով տվեցին իրենց մարդկանց, սա ի՞նչ էր նշանակում: Ընտրակաշառքից պետք է խոսի այն մարդը, որն ընդհանրապես այդ գործի գիտակը չէ, բայց ցավոք ընտրակաշառքից խոսում են ընտրակաշառք բաժանողները, ընտրակեղծիքից խոսում են ընտրակեղծիքներ կատարողները, նամուսից խոսում են նամուս չունեցողները: Ես չեմ ուզում անուններ տալ, բոլորն էլ լավ գիտեն նրանց»:
Նունե ԱՐԵՎՇԱՏՅԱՆ
