«Այս թիմում եղել են մարդիկ, որ իշխանությունում եղել են եւ երեսներս բաց եկել ենք ձեզ մոտ: Մեր հետեւից ամեն ինչ ասել են: Ասել են՝ լույս ենք գողանում, մազութ, փող ենք գողանում, կոնյակի գործարան ենք գողանում»,- ՀԱԿ-ի ապարանյան նախընտրական քարոզչության ժամանակ այսպես սկսեց իր խոսքը նախկին վարչապետ Հրանտ Բագրատյանը՝ ավելացնելով՝ «Բա ես կամ նախագահը կոնյակի գործարանը որ գողացած լինեինք, մենք այսօր միտինգի կարող էինք գալ ձեր մո՞տ: Բայց երբ որ ես գամ իշխանության, կասեմ` ով ինչ է գողացել»:
Իր ելույթում պարոն Բագրատյանը մի արտահայտություն արեց. «Մենք էլ մի բարի պտուղ չենք եղել, բայց ինչ-որ չտեսանք մեզանից հետո մի կարգին ուժ գար: Էն մեկը միլիարդատեր է, այ ախպեր, մենք էլ կարայինք անեինք»:
Aravot.am-ը պարոն Բագրատյանից հետաքրքրվեց` ի՞նչ նկատի ունեիք, երբ ասում էիք, որ դուք էլ մի բարի պտուղ չեք: Պարոն Բագրատյանը պատասխանեց. «Նկատի եմ ունեցել, որ մենք իդեալական չենք եղել: Իդեալական ոչ ոք չի, այդքան բան»:
Ըստ Հրանտ Բագրատյանի, միակ ուժը, որ իշխանության եղել է եւ կարող է երեսը բաց միտինգ անել՝ ՀԱԿ-ն է. «Շատ խոստումներ կլինեն, ամեն ինչ էջ առ էջ գրած, ծրագրավորած է, թե ինչ պիտի անեն գյուղացուն, ուսուցչին, ծննդաբերող մորը, թոշակառուին: Մենք չենք ասում՝ ձեզ աշխատանք ենք տալու, մենք ձեզ թույլ կտանք աշխատանք ստեղծել: Այս տաքսին, որ ստեղ կա՝ լիցենզիայով չի լինելու: Մարդը վերցնելու է, իրիկունը տաքսու նշանը խփի վրեն ու գնա քշի: Մենք տալու ենք ձեզ այդ ազատությունը: Խանութը լիցենզիայով չեք բացելու, որ չթողեն ամեն մեկդ խանութ առնի, խեղդեն, ասեն՝ մեր խանութները, մեր սուպերմարկետները պիտի լինեն, դուք մարդ չեք, դուք պիտի գաք մեր մոտ վարձու աշխատող լինեք»:
Կարդացեք նաև
Բագրատյանը նաեւ նշեց, որ «Ռեսկո», «Ինգո», «Նաիրի ինշուրանս», «Ռոսգոսստրախ», բոլորը իշխանության մարդկանց են պատկանում ու այսպես ասած «կլպում» են ժողովրդին. «Ի՞նչ ապահովագրություն, տուրք է, եթե ապահովագրություն է, թող մրցակցություն լինի: Թողեք թող 40 հազարի փոխարեն մենք ընկերություն ստեղծեինք՝ 8000-ով կաներ»:
Ի դեպ, ապարանցիների սիրտը շահելու համար Հրանտ Բագրատյանը այսօր դարձավ ապարանցի: «Կես դրույքով ապարանցի է»,- նրան ելույթից առաջ Մյասնիկ Մալխասյանն այսպես ներկայացրեց, ի պատասխան՝ Բագրատյանը ծիծաղեց ու ուղղեց՝ «Կես չի, մի դրույք է»:
Հռիփսիմե ՋԵԲԵՋՅԱՆ
