Խոսակցությունները, թե 21 ընտրատարածքի պատգամավորի թեկնածու Մերուժան Մխոյանին ծեծեցին ու ստիպեցին ինքնաբացարկի գնալ՝ մտահոգել է նաեւ Հայաստանի դեմոկրատական կուսակցության նախագահ Արամ Սարգսյանին: «Եթե իսկապես, ինքնաբացարկը այդ պատճառով է եղել, ապա դա վատ բան է հուշում: Ոստիկանությունը պետք է մարդու անվտանգությամբ լրջորեն զբաղվեր»,-Aravot.am-ի հետ զրույցում ասաց Ա. Սարգսյանը՝ կարծիք հայտնելով՝ եթե ընտրություններից առաջ են նման դեպքեր տեղի ունենում, ապա ընտրություններից հետո ավելի բարդ դեպքեր կարելի է սպասել:
Հայաստանի դեմոկրատական կուսակցությունն այսօր ներկայացրեց իր նախընտրական ծրագիրը, ինչը պարոն Սարգսյանի համոզմամբ, տարբեր է մյուս կուսակցությունների ծրագրերից ու հավատ ներշնչող .«Խոստումներ տալը տարբեր է լինում, եթե խոստումները նրանցն են, որոնք իշխանության մեջ են կամ եղել են, ապա ոչ ոք նրանց չէր խանգարում այդ պարտավորություններն այն ժամանակ անել: Ինչ վերաբերում է մեր կուսակցությանը, ասում ենք այն, ինչ գտնում ենք անհրաժեշտ իրականացնել: Հստակ մի բան ենք ձեւակերպել՝ այս համակարգից պետք է հրաժարվենք, այս համակարգը հեռանկար չունի: Սա առաջին տարբերությունն է մեր ու մյուս կուսակցությունների: Մենք առաջարկում ենք կառավարման նոր համակարգ»:
«Ես՝ մենք ենք» կարգախոսով առաջնորդվող կուսակցությունը նախընտրական ծրագրում առաջնահերթություններից է համարում ստվերի կրճատումը: «Պետության սեփականություն չկա, ամեն ինչ տվել են մասնավորին, նրանք էլ իրենց գրպաններն են հարստացնում: Եթե ստվերը կրճատենք 2,5 միլիարդ դրամով կավելացնենք բյուջեն»,- վստահեցնում է կուսակցության ղեկավարը: Գյուղատնտեսության ոլորտում դեմոկրատներն առաջարկում են գյուղատնտեսության ռազմավարության նոր ծրագիր, կրթության ոլորտում՝ կրթական ծրագրերի վերանայում, ուսուցիչների ու դասախոսների աշխատավարձերի բարձրացում, մշակույթի ոլորտում էլ է կուսակցությունը ռազմավարական փոփոխությունները կարեւորում, իսկ արտաքին քաղաքականության հարցում գտնում են, որ Ռուսաստանը ռազմավարական նշանակություն ունի Հայաստանի համար ու առաջարկում են երկու երկրների հարաբերությունների զարգացում:
Կարդացեք նաև
Արփինե ՍԻՄՈՆՅԱՆ
