Այսօր Գյումրու Վարդան Աճեմյանի անվան դրամատիկական թատրոնում թերևս առաջին անգամ նախատեսել էին մեծ շուքով նշել ոստիկանի օրը: Այդ նպատակով, դեռևս երկու շաբաթ առաջ զանգահարել կամ հատուկ հրավեր էին ուղարկել բոլոր լրագրողներին: Այսօր նկարահանող խմբերն ու լրագրողները ճիշտ ժամին` առավոտյան 11.00-ին, եղել են թատրոնի մոտ, սակայն դռները փակ են տեսել: Որոշ լրատվամիջոցների ներկայացուցիչներ հարկ են համարել ներկայանալ Շիրակի մարզային ոստիկանություն ու պարզել, թե ի՞նչ է կատարվում, մի՞թե պատճառը Գյումրիում ստեղծված լարված, ողբերգական մթնոլորտն է:
Հիշեցնենք, որ երկու օր առաջ պարտականությունները կատարելու առումով սարսափելի ծանր օր էր շիրակցի ոստիկանների ու նաև շարքային գյումրեցիների համար: Ամսի 12-ին գյումրեցիները, նախևառաջ ծեծելով, բողոքի ակցիա կազմակերպելով, քաղաքից դուրս վռնդեցին ադրբեջանական ֆիլմերի փառատոնի կազմակերպիչ Գեորգի Վանյանին. ոստիկանները Գյումրու ժուռնալիստների «Ասպարեզ» ակումբի մոտ լարված հսկում էին, որ զայրացած գյումրեցիները հանկարծ չսպանեն նրան: Վանյանին մի կերպ փախեցնելով գյումրեցի դաշնակցականների, երկրապահների ու քաղաքապետարանի աշխատակիցների ձեռքից ու մայրաքաղաք ճանապարհելով, իրավապահները նույն օրը այլ պատմության մեջ ընկան: Ժամեր անց սպանեցին Գյումրու քաղաքապետի դստեր փեսացուին`27-ամյա Կարեն Եսայանին, իսկ ուշ երեկոյան ավտովթարի ենթարկեցին այս սպանության քննչական խմբի անդամներից մեկին` Շիրակի մարզի քննչական բաժնի հատկապես կարևորագույն գործերով ավագ քննիչ Վահրամ Բեյբությանին, ով մահացավ շտապօգնության մեքենայի մեջ` հիվանդանոց տանելու ճանապարհին:
Մի խոսքով, այս ամենը լուրջ պատճառ էր տոնի մասին մոռանալու համար: Ոստիկանությունից լրագրողներին պարզաբանել են, որ տոն նշելու տրամադրություն չի մնացել, մի քիչ էթիկա է պետք. իրենց կոլեգայի դիակը դեռ հողին չհանձնած ինչպե՞ս կարող են ծափահարել ու ուրախանալ: Նշենք, որ 58-ամյա փորձառու քննիչին կհողարկավորեն վաղը, նա Շիրակի մարզպետարանի առողջապահության վարչության նախկին պետի` Սաթենիկ Բեյբությանի հարազատ եղբայրն է:
Կարդացեք նաև
Նունե ԱՐԵՎՇԱՏՅԱՆ
