Հայաստանի դեմոկրատական կուսակցության նախագահ Արամ Սարգսյանը, քաղաքական ուժերի մեջ սկսված ընտրապայքարը գնահատելով որպես կռիվ այն բանի համար, թե «ով է վերցնում իշխանությունը», զավեշտալի համարեց այն , որ Լևոն Տեր-Պետրոսյանն ու Ռոբերտ Քոչարյանը դուրս են եկել Սերժ Սարգսյանի դեմ: «Դա ամենազավեշտն է, որովհետև նորմալ պետություններում, նրանք, ովքեր արդեն եղել են նախագահներ, գնում են իրենց գործով են զբաղվում , գործողի դեմ պայքարում են արդեն նրանք, ովքեր չեն եղել նախագահ: Իսկ էստեղ չկա տրամաբանություն»,-ասաց պարոն Սարգսյանը: Մեր այն հարցին էլ, թե ՀԴԿ-ի առաջնորդի կարծիքով նախագահներից ո՞ր մեկին կհաջողվի վերցնել իշխանությունը, Արամ Սարգսյանն ասաց. «Ես գտնում եմ, որ այստեղ աշխատանքը շատ նրբին պետք է լինի, օրինակ` մենք երբևիցէ չենք համակերպվի ոչ առաջին նախագահի վերադարձին, ոչ էլ երկրորդ: Երրորդի հետ կապված ընդամենը ասում եմ ` եթե ինքը իրականում փորձի մեր սկզբունքները ընդունի և ոչ միայն ընդունի, այլ կուզենա իրականացնի մեր կուսակցության ծրագրային դրույթները, այո, մենք կարող ենք ինչ-որ չափով իրականացնել», – ակնարկեց Արամ Սարգսյանը: Ընտրակեղծիքների դեմ միասնական համաձայնագիր ստորագրելու հետ կապված էլ քաղաքական գործիչը հայտնեց, որ հրաժարվում են ժամանակին կեղծիքներ թույլ տված ու սրբացած մարդկանց հետ ինչ-որ բան ստորագրել: «Կեղծիքները սկսել է Լևոն Տեր-Պետրոսյանը 95 թվականից, նա է մեզանից գողացել մեր ձայները, որ կուսակցությունը չի անցել խորհրդարան, 96-ին նորից մեր միասնական թեկնածուն հաղթել է, զորք է դուրս բերել , ես նրա հետ ո՞նց գնամ ինչ-որ մի վեհ գաղափարի վերաբերյալ բան ստորագրեմ, ես ինքս ինձ հարգող մարդ եմ»,- մեկնաբանեց ՀԴԿ առաջնորդը: Իսկ ՀՀԿ-ի առաջարկած նույնաբովանդակ կանոնների հետ կապված էլ, ասաց . «Մենք մեր առաջարկություններն ունենք, մենք ընդամենը իրենց կասենք, դուք ի՞նչ եք առաջարկում, ուզում եք, որ բոլորս կեղծիք չանենք չէ՞, դե բերեք, էն ոնց որ դպրոցում են ասում` մամայիս, պապայիս արև, էդ բանը չեմ անի: Կասենք` հիմի գրեք `մենք չենք կեղծի և ամեն ինչ կանենք, որպեսզի էդ ամեն ինչը չլինի ու կստորագրենք, եթե դա է էդ ամբողջ իմաստը, մենք պատրաստ ենք»: Ի դեպ, քաղաքական գործիչը ընտրությունների արդար անցկացման հավանականություն չի տեսնում, քանի որ, ըստ նրա, արդեն իսկ սկսվել են անարդարությունները, վարչական ռեսուսների օգտագործումը, փողերի շռայլորեն բաժանումը: «Ես ընդամենը մի բանի մասին եմ մտածում, որ մեր ձայները այլևս չգողանան, և նկարչությամբ չզբաղվեն, լցոնումներ չանեն: Ընդամենը էդքան ու կհամարենք, որ ինչ-որ մի քայլ առաջ ենք արել»,-եզրափակեց Դեմկուսի առաջնորդը:
Նունե ԱՐԵՎՇԱՏՅԱՆ
