ԲՀԿ առաջնորդը այսօր քարոզարշավի էր եկել Շիրակի մարզի ամենաքաղաքականցված քաղաք` Արթիկ: Նա նախատեսված ժամից մի բան էլ շուտ էր սկսել իր ելույթը` ամենայն հավանականությամբ տեսնելով, որ հրապարակում ունկնդիրների պակաս չկա:
Գագիկ Ծառուկյանը այստեղ խոսեց պատգամավորի պարտականություններից, նշելով, որ խորհրդարան պետք է մտնի այն մարդը, ով կարող է ժողովրդի հոգսը, ծանրությունը տանել: «ժողովուրդը պետք է իրեն գնահատված, պաշտպանված զգա, ժողովուրդը հույսով, հավատով կարող է սպասել 1 ամիս, 2 ամիս, 3 ամիս, բայց օր օրի տեսնելով, որ կա փոփոխություն, կա ուշադրություն, պրոբլեմները շատ են, բայց ամենակարևորը իմացեք, այդ բոլորը լուծում ունեն: 20 հատ, թե 50 պրոբլեմ կա, բայց առաջնայինը մեր ժողովրդի զբաղվածության խնդիրն է , հնարավորություն, պայման, զբաղվածություն, մարդը պետք է զբաղվածություն ունենա, որ կարողանա իր ընտանիքի հացը վաստակի, իր ընտանքին կերակրի: Տղամարդը չպետք է ընկճված տուն մտնի, պետք է հպարտ մտնի, կնոջ ժպիտը երեսից չպիտի պակասի»,-հայ ընտանիքի երջանկության բանաձեւը ներկայացրեց պարոն Ծառուկյանը:
Նա նաև անդրադարձավ փոքր ու միջին բիզնեսին` շեշտելով, որ եթե մարդը օրական վաստակում է 5000-10 000 դրամ, նա պետք է ազատվի հիմնական բոլոր հարկերից: «Այսօր տաքսիստների, փոքր ու միջին բիզնեսի, ասենք թե վարսավիրանոցների համար հաստատագրած է, որը պարտադրում է երեք ամիսը միանգամից վճարել, ինչի՞ համար, մարդը թող մի ամիս աշխատի, ամսվա վերջին իր հարկերը կվճարի, կարող է մեքենան փչանում ա, կարող ա մի ամսից վարսավիրանոցը կամ կրպակը փակվում ա, ամիսը կաշխատի, իր համապատասխան գումարը կվճարի, բայց կանխավաճարը 3 ամսվա արդեն դա պրոբլեմ ա չէ՞ այս ծանր ֆինանսական ճգնաժամի ժամանակ»,-ասաց պարոն Ծառուկյանը:
Նա խոսեց նաև ավանդների վերադարձման խնդրից` շեշտելով, որ այն պետք է սկսել ամենածերերից ու անօգնական ընտանիքներից: Եվ երբ հերթը հասավ Արթիկում ԲՀԿ-ի կողմից առաջադրված մեծամասնական թեկնածուին`ԱԺ պատգամավոր Մուշեղ Պետոյանին ներկայացնելուն` արթիկցի մի ծերունի տեղից բացականչեց. «Ծառուկյան ջան, էնպիսի մարդ դրեք, որ կոճակ սեղմող չլինի, մենք արդեն հոգնել ենք»: Ի դեպ, այս ծերունին երկու օր առաջ ելույթ ունեցավ նաև ՀՅԴ-ի Արթիկ կատարած այցի ժամանակ` հայտարարելով, որ մեր երկրի փրկությունը մականունավորներից ազատվելու մեջ է: Ի պատասխան նրան, Ծառուկյանը հակադարձեց. «էդ կոճակ սեղմողներին էլ ձայնը դուք եք տալիս, ես ձեր հետ խոսում եմ որպես ձեզնից մեկը, սրան-նրան մեղադրել, ձեր ցավը տանեմ, չի կարելի»:
Կարդացեք նաև
Արթիկում մեծահարուստ Գագիկ Ծառուկյանին տրցակներով նամակներ հանձնեցին, ու թեև նա շատ էր շտապում, այդուհանդերձ աղքատ կանայք հասցրեցին շրջափակել ու մի քանի խնդրանք ներկայացնել նրան:
Նունե ԱՐԵՎՇԱՏՅԱՆ
