«Ժառանգություն» կուսակցության ընտրական հերթական հանդիպումն այսօր Գեղարքունիքի մարզում էր: Կուսակցության առաջին կայանատեղին մարզկենտրոն Գավառ քաղաքն էր:
«Ժառանգության» ավտոբուսը կայանեց Գավառի կենտրոնական հրապարակում, եւ Րաֆֆի Հովհաննիսյանն իջավ ու քայլելով սկսեց բարեւել ժողովրդին:
Կուսակցության առաջնորդը մտավ Գավառի հանրախանութ, անցավ բաց եւ փակ շուկաներով ու Գավառի մշակույթի պալատի դիմաց սկսեց նախընտրական հանդիպումը գավառցիների հետ:
Իսկ մինչ այդ կուսակցության առաջնորդին ուղեկցում էին երիտասարդ «ժառանգորդները» եւ բնակիչներին բաժանում կուսակցության ծրագիրը: Գավառի բնակիչներից մեկը վերցրեց բուկլետն ու դիմեց կուսակցության երիտասարդ ներկայացուցչին. «Բը փարա չեք տալո՞ւմ»:
Կարդացեք նաև
Արեւածաղիկ ու համեմունքներ վաճառող կինը, զարմացած անծանոթ տղամարդու ձեռքսեղմումից՝ հավաքվածներին հարցրեց. «Էս ո՞նն էր էս մարդը, բարեւ տվեց, հնցավ: Վայ, քա հիշեցի, տելեվիզրով խոսում ա»:
«Ժառանգություն» կուսակցության նախընտական քարոզարշավին եկել էին քչաթիվ քյավառցիներ. հիմնականում նրանց գաղափարակիցներն էին:
«Ժառանգության» ղեկավարը քարոզչական իր ելույթում ասաց. «Այն ինչ-որ մեր ուղեղներում է, մեր հոգիներում, պետք է մայիսի 6-ին արձանագրվի որպես մեծ հաղթանակ: Գավառը եթե ուզենա այդ հաղթանակը, ինքն էլ գիտի, ինչ պիտի անի: Մեր ձեռքերում է մեր ապագան: Եթե ուզենանք, պիտի փոխենք մեր երկիրը:
Եթե դուք ուզում եք ողորմության փոխարեն աշխատանք, աշխատավարձ, թոշակ, բոլորին, շարքային մարդուն, բանվորին, ոստիկանին, հանրային ծառայողին, բժշկին, ուսուցչին, 5 տարի «Ժառանգությունը» ձեզ է ծառայելու որպես ազգային ժողովի մեծամասնություն, կառավարություն: Ոչ մի ավելորդ լումա, ոչ մի մասնավոր բիզնես, ոչ մի ժողովրդի գրպանից հանված շռայլություն, շամպանսկայա, թիկնապահներ եւ այլն: Մեզնից մի սպասեք դղյակներ, ջիփեր, պետական փողերի շռայլ օգտագործում, այլ 5 տարի սովորական մարդու, քյավառցու թասիբին համապատասխան ծառայություն»:
«Ժառանգության» համամասնական ցուցակում ընդգրկված Կարապետ Ռուբինյանն իր ելույթի սկզբում նշեց. «Երեւում է, ճակատիս գրված է, որ այսօր էլ պիտի մրսեմ»: Իր հետագա ասելիքում հիմնական շեշտը դրեց կուսակցության կայուն դիրքի, իրավական կայունության վրա:
«Մյուս խորհդարանական կուսակցությունները պարզապես խուսափում են հաշվետվություն ներկայացնելուց, որովհետեւ որեւէ դրական բան չունեն ձեզ ասելու»:
«Մենք գալիս ենք, եւ մնում է, որ մեր քաղաքացիներն էլ մեր հետ գան, այլ չմնան այն 20 տարվա մեջ: Ինչպես 1915 թվականին մեկուկես միլիոն մարդ զոհվեց, շատերը լքեցին հայկական բարձրավանդակը,այնպես էլ այս 20 ազատության ու անկախության տարիներին, որ պիտի լիներ իրական ազգահավաքը, մեկուկես միլիոն մարդ լքեց հայրենիքը: Մենք գալիս ենք մեր վերադարձը կազմակերպելու համար, այն կառավարությունը ստեղծելու համար, որը հարիր է հայ մարդուն»,- այսպիսի ելույթով հանդես եկավ «Ժառանգության» անդամ Զարուհի Փոստանջյանը:
Քարոզարշավի ավարտին հանդես եկավ «Ժառանգության» անդամ, գավառցիների համաքաղաքացի Ռուբեն Հակոբյան. «Քյավառցին միշտ բոնուսով է ապրել: Եթե քյավառցի ես, ապա պարտավոր ես լավը լինել, արժանապատիվ ու կռվող լինել եւ որեւէ մեկին չենթարկվել: Ես չեմ ասի «Ժառանգությանը» ձայն տվեք, դուք ձայն տվեք ձեր խղճին»:
Հավաքված քյառավցիներից մեկը «Առավոտի» հարցին պատասխանեց . «Ժառանգության խետ աբրում ենք էլի, մէ բան գլնի, չմտածես»:
Անի ՊՈՂՈՍՅԱՆ
