Մայիսի 6-ին կայանալիք ԱԺ ընտրություններին մասնակցող քաղաքական ինը ուժերի համամասնական ցուցակի առաջին բազմազավակ տասնյակը գլխավորում է «Ժառանգություն» կուսակցությունը: Aravot.am-ի հարցումներով, «Ժառանգության» ցուցակի առաջին տասը տեղեր զբաղեցնող թեկնածուներն ընդհանուր հաշվով ունեն 25 երեխա: Նրան հաջորդում է ԲՀԿ-ն՝ 24 երեխա: ՀԱԿ-ի, ՀՅԴ-ի, ՀՀԿ-ի առաջին տասնյակի թեկնածուներն ունեն 22, Դեմկուսը՝ 19 եւ ՕԵԿ-ի առաջին տասնյակի թեկնածուները՝ 15 երեխա: Մեզ այդպես էլ չհաջողվեց պարզել միայն ՀԿԿ-ի եւ «Միավորված հայեր» կուսակցությունների տվյալները: Այս կուսակցություններում մեր հարցին որեւէ մեկը չկարողացավ հստակ պատասխան տալ, այդ թվում՝ կուսակցությունների առաջնորդները:
Վերը նշված հինգ քաղաքական ուժերի համամասնական ցուցակի առաջին տասնյակում ամենաբազմազավակ թեկնածուն ԲՀԿ-ի առաջնորդ Գագիկ Ծառուկյանն է. նա ունի 6 երեխա: «Ժառանգության» նախագահ Րաֆֆի Հովհաննիսյանն ու այդ ցուցակում 6-րդ հորիզոնականը զբաղեցնող փորձագետ Թեւան Պողոսյանն ունեն հինգական երեխա: Չորս երեխա ունեն ՀՀԿ-ական Տարոն Մարգարյանն ու «Ժառանգության» ներկայացուցիչ Զարուհի Փոստանջյանը:
Այս ուժերի ցուցակում կան նաեւ մարդիկ, ովքեր երեխաներ չունեն. ՀՀԿ-ի ցուցակում դա Սփյուռքի նախարար Հրանուշ Հակոբյանն է, ԲՀԿ-ի ցուցակում՝ Հմայակ Հովհաննիսյանը, ՀՅԴ-ից՝ Կարեն Շահմուրադյանը, ՀԴԿ-ից՝ Ջուլիետա Մարտիրոսյանը:
Մայիսի 6-ին կայանալիք ընտրություններում առաջադրված 9 քաղաքական ուժեր «թոփ տասնյակից» «ամենածերը» Դեմկուսն է. նրա համամասնական ցուցակի առաջին տասը տեղերը զբաղեցնողների տարիքն ընդհանուր հաշվով 631 է, հետո Կոմկուսն է՝ 604, նրան հաջորդում է «Միավորված հայեր» կուսակցությունը՝ 574, ՀՀԿ-ն՝ 546, ՀԱԿ-ը՝ 535, ԲՀԿ-ն՝ 524, ՕԵԿ-ը՝ 470, ՀՅԴ-ն՝ 461 եւ «ամենաերիտասարդ« կուսակցությունն այս «թոփ տասնյակի» վիճակագրության համաձայն՝ «Ժառանգությունն» է, որի ցուցակում առաջին 10 թեկնածուների տարիքն ընդհանուր հաշվարկով 453 է:
Կարդացեք նաև
Մեր ուսումնասիրության ամփոփ արդյունքն այն է, որ «Ժառանգության» համամասնական ցուցակի առաջին տասնյակն ամենաբազմազավակն ու երիտասարդն է:
