Ապրիլի 26-ին Սերժ Սարգսյանը նախընտրական հանդիպումներ ունեցավ Բերդում, Նոյեմբերյանում, Իջեւանում: ՀՀԿ ղեկավարի հետ հանդիպումներին հոծ բազմություն էր հավաքվել, սակայն հավաքվածների մեջ մեծ թիվ էին կազմում դպրոցականները: Վերջիններիս հրապուրել էր նախագահի ելույթից առաջ հայ կատարողների մասնակցությամբ համերգը : Նոյեմբերյանում Սերժ Սարգսյանը խոսեց գործազրկության , աղքատության խնդիրների մասին, ասելով. «Աղքատությունը այսօր համազգային ոսոխ է, հակառակորդ, որի դեմ պայքարին պիտի միացնենք մեր բոլորի ուժերը»:
Նախագահի խոսքերով՝ պետք է ստեղծել այնպիսի պայմաններ, որ գործունյա մարդիկ մարզերում կարողանան սեփական գործ ստեղծել: Նա ասաց, որ բոլոր խնդիրները մեկ օրում լուծելու համար կախարդական դեղատոմս չկա, սակայն իրենք գիտեն, թե առաջիկա հինգ տարիների ընթացքում խնդիրները ինչպես են լուծելու: Սերժ Սարգսյանը երկրի զարգացումը համեմատեց ճանապարհի հետ, որի ամենաբարդ հատվածը հետեւում է մնացել, Հայաստանը մուտք է գործել այդ ճանապարհի հարթ ու բարեկարգ հատված:
Նա նոյեմբերյանցիներին եւ իջեւանցիներին երկու խնդրանք ուներ՝ ակտիվորեն մասնակցել «նորանկախ Հայաստանի լավագույն ընտրություններին» եւ սատարել ՀՀԿ-ին: Իջեւանի Շատրվանների հրապարակում նրա ելույթը երկրում տիրող իրավիճակի վերաբերյալ քննադատական շեշտադրումներ ուներ:
Սերժ Սարգսյանն ասաց, որ այսօր փոփոխությունների հասարակական լուրջ պահանջ կա, որ ՀՀԿ-ն նախաձեռնել է որակական փոփոխություններ: Նախագահը խոսեց քաղաքական սերնդափոխության անհրաժեշտության մասին: Նրա համոզմամբ՝ համակարգային փոփոխություններ իրականացնելու համար բավարար չեն հին կադրերը նոր կադրերով փոխարինելը եւ տարիքային սերնդափոխությունը, պետական պաշտոնին նշանակելիս մրցունակ կրթությունը պետք է գերակա լինի: Ս.Սարգսյանն ասաց, որ երիտասարդ կադրերի համար պետք է մեծացնել պետական կառավարման համակարգի գրավչությունը ՝ նրանց աշխատավարձերի բարձրացման եւ սոցիալական փաթեթների ներդրման միջոցով: Մյուս կողմից պետք է անողոք եւ հետեւողական պայքար տանել արատավոր երեւույթների՝ կոռուպցիոն դրեւորումների, հովանավորչության ե խորհրդային իներցիայով մեզ հասած ժամավաճառության ե եւ ցուցադրականության դեմ: Երկիրի նախագահն ասվածին հավելեց. «Այս ամենին կարելի է ավելացնել նաեւ մերօրյա հոռի բարքեր համարվող զոռբայականությունը, որոշ պաշտոնյաների արտոնյալ կարգավիճակը, եթե կուզեք՝ սանձարձակությունը»:
Կարդացեք նաև
Սերժ Սարգսյանը իջեւանցիներին հավաստիացրեց, որ նման վարքով պաշտոնյաները պետական համակարգում տեղ չեն ունենալու, որ պետական կառավարման համակարգը պետք է թափանցիկ եւ հաշվետվողական է լինի, պետք է խրախուսել երիտասարդ կանանց մուտքը պետական կառավարման համակարգ:
ՀՀԿ ղեկավարը հորդորեց ձայն տալ ՀՀԿ-ի կողմից առաջադրված մեծամասնական թեկնածուներին՝ Հակոբ Հակոբյանին եւ Մարինե Մարաբյանին:
Ոսկան ՍԱՐԳՍՅԱՆ
