Ինչպես տեղեկացրել ենք, այսօր ՀՀ նախագահ Սերժ Սարգսյանը քարոզարշավի էր եկել Շիրակի մարզ: Նրա առաջին կանգառը Մարալիկում էր, որտեղ այնպիսի հորդառատ ու սառը անձրև էր տեղում, որ նույնիսկ նախագահը վատ զգաց դպրոցահասակ երեխաների մասնակցությունից: «Սիրելի մարալիկցիներ, կներեք, որ այս հանդիպման պատճառով երեխաները կարող են թրջվել անձրևից»,-ասաց Սերժ Սարգսյանը:
Նշենք, որ նախագահը ևս թրջվեց, քանի որ բեմում ելույթ էր ունենում առանց անձրևանոցի: Մարալիկի հրապարակը, շնորհիվ երիտասարդ քաղաքապետի`ՀՀԿ-ական Արտակ Գևորգյանի, բավականին մարդաշատ էր, սակայն պարզվեց, որ հավաքվածների մեծ մասը եկել էին ոչ թե ստիպողաբար, ինչպես Գյումրիում ու Արթիկում, այլ ինքնակամ, եկել էին բողոքի: Նրանք հիմնականում դժգոհում էին սոցիալական պայմաններից, բազմաբնակարան շենքերի կտուրների կաթկթոցից:
Շիրակի մարզի հոգսաշատ ու ամայացող 3-րդ քաղաքում նախագահը տնտեսական զարգացման խոստումներ տվեց` հայտարարելով, որ տեր է բացթողումներին: «Հանրապետականը միշտ եղել է ձեր կողքին բոլոր տարիներին և աշխատել է ձեզ հետ միասին: Հանրապետականը ազնիվ է եղել իր նպատակադրումներում, ազնիվ է եղել իր ծրագրերում և գործերում: Մենք երբեք մեր արածից չենք հրաժարվել, այո , մենք ունեցել ենք բացթողումներ, բայց տեր ենք մեր այդ բացթողումներին և թերություններին ևս: Միևնույն ժամանակ հանրապետականը տեր է բազմաթիվ ձեռքբերումների ու նվաճումների, որոնցով մենք ավելի ուժեղ ենք դարձել: Հանրապետականը շատ բան է արել, բայց դեռ ավելին ունի անելու , այսօր մեր քաղաքական ուժը անհամեմատելի է իր փորձով, տարածումով և ժողովրդականությամբ», -ասաց նախագահը` շեշտելով, որ երկրում չկա գեթ մի համայնք, որի խնդիրներին Հանրապետականը անդրադարձած չլինի:
Կարդացեք նաև
Այնուհետ նա խոսեց փոփոխություններից, ասաց, որ տնտեսական աճից այսուհետ անցնելու են տնտեսական հաջողությունների, որը հասանելի ու շոշափելի կդառնա յուրաքանչյուր քաղաքացու համար: «Դա նշանակում է ավելի զարգացնել արտադրական հնարավորությունները, որպեսզի նոր ասպարեզ բացվի յուրաքանչյուր աշխատունակ մարդու համար, Հայաստանի յուրաքանչյուր քաղաքացի պետք է ի վիճակի լինի արժանապատվությամբ վաստակել իր և իր ընտանիքի ապրուստի համար անհրաժեշտ միջոցները: Տնտեսական քաղաքականության փոփոխության շնորհիվ մենք որդերգրել ենք արդյունաբերական նոր մոտեցումներ, որոնց շնորհիվ ներգրավում ենք նոր տեխնոլոգիաներ և նոր ներդրումներ: Այնտեղ որտեղ հնարավոր է , փորձում ենք ներմուծումը փոխարինել տեղական արտադրությամբ, միևնույն ժամանակ փորձում ենք Հայաստանում կազմակերպել այն արտադրությունները, որոնք կարող են սպառում գտնել մեր երկրում և պահանջարկ ունենալ արտասահամանում: Մեր կարևորագույն նպատակներից մեկն է կերպարանափոխել տնտեսությունը , ապրանքներ ներկրող տնտեսությունից մենք պետք է վերափոխվենք ապրանքներ ու ծառայություններ արտահանող տնտեսության:Մենք չունենք նավթ ու գազ և մեր հիմնական հարստությունը մեր մարդկային ռեսուրսն է, մեր մարդկանց տաղանդը »,-ասաց նախագահը:
Եվ երբ նա հեռանում էր, նրան ուղղակի բողոքախեղդ արեցին, չնայած անվանգության աշխատակիցները ամեն ինչ անում էին, որպեսզի քաղաքացիները չմոտենան նախագահին, նույնիսկ լրագրողներին էին արգելում ձայնագրել Սերժ Սարգսյանի ու դժգոհող մարալիկցիների զրույցը:
Նունե ԱՐԵՎՇԱՏՅԱՆ
