Ապրիլի 29-ին Նոյեմբերյանում ՀԱԿ նախընտրական հանդիպման ժամանակ նախկին վարչապետ Հրանտ Բագրատյանն ասաց, որ երկու օր առաջ այցելել է Քաջարան, այդ ճանապարհը ծովի մակերեւույթից 1400մ բարձրությունից հասնում է 2500 մետր : Նրա խոսքերով՝ նշված ճանապարհի խնդիրը նեղ լինելը չէ, այլ ՝ բարձրանալ-իջնելը, որից մեքենաները տուժում են, որ Հայաստանի համար «նեղ տարիներին» իրենք թունել էին կառուցում: Բագրատյանն ասաց, որ Ռոբերտ Քոչարյանը Քրըք Քըրքորյանի տրամադրած 22 միլիոն դոլարը ծախսել է վերոնշված ճանապարհի կողքով, մի 100 մ ցած, Լիճքով ճանապարհ կառուցելու համար, որից սակայն չեն օգտվում: Նույն միջոցներով կառուցված Ոսկեպար-Կիրանց շրջանցիկ ճանապարհն անվտանգության խնդիրը չի լուծում, քանի որ ճանապարհի երկու ծայրերը խոցելի են ադրբեջանական զինուժի կողմից: Բագրատյանը հայտարարեց. «Կարելի էր մի թունել սարքել, գործը մի անգամ անել, մի ֆունդամենտալ կառույց սարքել, վերջացնել այս պատմությունը»: Նախկին վարչապետի խոսքերով՝ Իջեւան-Բերդ ճանապարհը կարելի էր կառուցապատել ոչ թե սահմանի երկայնքով, Վազաշենով, այլ հարկ էր ասֆալտապատել հին՝ Իծաքար-Գանձաքար ճանապարհը, այն հնարավոր ռազմական գործողությունների ժամանակ անվտանգ է: «Ազատություն» կուսակցության առաջնորդի վկայությամբ՝ Հայաստանի արտաքին պարտքը մի քանի օր առաջ ավելացել է 500 միլիոն դոլարով՝ 4 միլիարդից հասնելով 4,5 միլիարդ դոլարի, կառավարությունը 500 միլիոն դոլար վարկ է վերցրել Հյուսիս –Հարավ ճանապարհ կառուցելու համար: «Ազատություն» կուսակցության նախագահը հայտարարեց. «Առաջին 100 միլիոնը ծախսելու են Արարատ-Երեւան, Երեւան-Աշտարակ ճամփեն սարքելու, «վիսշի կլաս»անելու համար՝ իրենց ասելով: Արա, Երեւան-Արարատ ճանապարհում պրոբլեմ կա՞, որ դա եք սարքում, թե՞ ատկատ ստանալու խնդիր կա, պետության պարտքն էլ 500 միլիոն ավելացնում եք: Գժվե՞լ եք, ընդհանրապես, եւ մի խելագարի պես վարչապետը նստում է… Ու այդ շինարարությունն էլ տալիս են իսպանացիներին: Մենք ինչ է ՝ ասֆալտ փռել չգիտե՞նք, անգամ եթե չգիտենք, մի 100 հազար ծախսեիք , տանեիք 20 հոգու սովորեցնեիք ասֆալտ փռելը, սարքեն: Էս ի՞նչ է կատարվում,վաբշե գիժ են, գիտեք՝ նախագահն անտեղյա՞կ է: Սրանց քոքը պետք է կտրել, քոքը, սա տեսակ չէ, սա սարանչա է: Ամոթ է մեզ, ինչու՞ եք գնում երկրից, սրանց ղրկենք այս երկրից ու պրծնենք»:
Ոսկան Սարգսյան
Կարդացեք նաև
