«Վերջին շրջանում փորձ են անում անձնավորված վատաբանել մեր առաջին դեմքերին, շահարկել մեր՝ ժամանակին իշխանության մեջ եղած լինելը, հակասություն գտնել դաշնացության ղեկավարության եւ շարքերի մեջ:
Այս 20 տարվա ընթացքում միշտ այդ փորձերն արել են, դաշնակցությունը ապացուցել է, որ կազմակերպված կառույցի միասնական թիմ է, Հայաստանում դաշնակցությունն ունի 6000-6500 կուսակցական, երբեք դրանից ավելի չենք եղել, բայց հավաքել ենք 178 հազար ձայն, փորձել ՀՅԴ-ի մեջ պառակտում մտցնել՝ չի հաջողվել ոչ մեր արտաքին թշնամիներին, ոչ ներքին մրցակիցներին»,- այսօր «Հայելի» ակումբում հայտարարեց նախկին սոցապ նախարար, ՀՅԴ անդամ Աղվան Վարդանյանը: Ներքին մրցակիցներ պարոն Վարդանյանը համարում է բոլոր առաջադրված կուսակցություններին՝ կոմունիստներից սկսած: Աղվան Վարդանյանը անդրադառնալով քարոզչության ընթացքին, նշեց. «Մեզ փորձում են ներկայացել, թե ընդդիմությունը միայն նա է, ով գիշեր-ցերեկ հայհոյում է, երկիրը գցում ցնցումների մեջ, չէ, դա ընդդիմություն չէ, դա ուրիշ բան է»: Պարոն Վարդանյանը հաստատեց, որ խոսքը ՀԱԿ-ի մասին է: Պարոն Վարդանյանի համոզմամբ՝ «Այսօր մենք ընդդիմություն ենք, ամենակարգին ընդդիմությունը»:
Հարցին՝ ինչո՞ւ թեկնածուները չեն գալիս բանավեճերիի՝ նա պատասխանեց. «Ի՞նչ ասեմ, մարդն իրավունք ունի համեմատելու: Իրավունք ունի ակնկալելու, որ քաղաքական ուժի ներկայացուցիչները պիտի նստեն իրենց առաջ ու ներկայացնեն իրենց ծրագրերը, որ մարդը կողմնորոշվի: Քաղաքակիրթ ձեւը սա է, պիտի բանավիճեն, հաջորդ օրը տեսնեն, թե ում ռեյտինգն աճեց: Մտածում են, որ գյուղապետով տուն առ տուն մտնեն, քան թե բանավիճեն»: Իսկ թե ինչո՞ւ ՀՅԴ ցուցակի առաջին տեղերը չեն ուզում մտնել բանավեճի մեջ՝ պարոն Վարդանյանը հերքեց՝ ասելով, որ «Վահան Հովհաննիսյանը պաշտոնապես հայտարարել է՝ պատրաստ եմ ցանկացածի հետ բանավիճել մեր ներայացրած ծրագրային դրույթների շուրջ»:
Հռիփսիմե ՋԵԲԵՋՅԱՆ
