«Արցախում անցկացված զորահանդեսը՝ նվիրված Շուշիի ազատագրման 20-ամյակին, Բաքվում շատ մարդիկ լուրջ ապտակ համարեցին»,-հայտարարեց ռազմական փորձագետ Արծրուն Հովհաննիսյանը: Aravot.am-ը հետաքրքրվեց՝ կոնկրետ զարգացումներ եղե°լ են: Պարոն Հովհաննիսյանը նշեց, որ դեռ այդպիսիք չկան, սակայն առաջիկա օրերին սպասելի են զարգացումներ և սադրանքներ ադրբեջանական կողմից: Ռազմական փորձագետը, ելնելով ռազմավարական տեսանկյունից, առանձնապես մանրամասնորեն չնկարագրելով, նշեց, որ Արցախում կազմակերպված զորահանդեսին ներկայացված են ՀՕՊ համակարգեր, նոր, կատարելագործված այլ համակարգեր: Հարցին՝ հայկական օդային ուժերը արդյո°ք բավարար են՝ համեմատելով Ադրբեջանի օդուժի հետ, Ա. Հովհաննիսյանը պատասխանեց. «Տեղին չէ համեմատել հայկական օդուժն ադրբեջանականի հետ: Հաշվի առնելով պատերազմի զարգացման հավանական սցենարը, աշխարհագրական դիրքը՝ չեմ կարծում, որ օդային պաշտպանության համակարգերի լայն կիրառություն է ենթադրվում: Իսկ Ադրբեջանի օդուժի PR-ը ավելի շատ ձևական կողմ ունի, քան կիրառական»:
Լրագրողները հետաքրքրվեցին՝ արդյո°ք Արցախում կազմակերպված զորահանդեսը «մեսիջ» էր՝ ուղղված Ադրբեջանին, որ հայկական բանակը մարտունակ է և ցանկացած պահի կարող է հակահարված տալ: Ռազմական փորձագետը պատասխանեց. «Առաջին անգամ հայկական բանակը ցույց տվեց, որ պաշտպանական բանակը կարող է հուժկու հարվածներ հասցնել»:
Մինչ զորահանդեսի անցկացումը՝ ադրբեջանական կողմից անընդհատ հնչում էին հայտարարություններ, թե «հարամ» են անելու Արցախում կազմակերպվող զորահանդեսը: Այս առիթով Ա. Հովհաննիսյանն ասաց. «Ոչ միայն շքեղությամբ անցկացրինք զորահանդեսը, այլև ցույց տվեցինք, որ զուգահեռաբար կարող ենք հսկել նաև սահմանը»:
Տաթև ՀԱՐՈՒԹՅՈՒՆՅԱՆ
Կարդացեք նաև
