Քաղաքագետ Ալեքսանդր Իսկանդարյանի գնահատմամբ, Հայաստանում ներքաղաքական հիմնական պայքարն ընթանում է ոչ թե իշխանությունների ու ընդդիմության, այլ հենց իշխանության ներսում: Ըստ նրա, ՀՀԿ-ի դիմակայությունը ոչ թե ԲՀԿ-ի, այլ հենց իր ներսում է: «Իշխանական կուսակցություն երկրում չկա»,- այսօր, «Կովկաս 2011» գիտաժողովի ընթացքում ասաց քաղաքագետը՝ ասածը հիմնավորելով ընտրություններից առաջ մի շարք պաշտոնյաների ՝ Երեւանի քաղաքապետի, Աժ խոսնակի, ոստիկանապետի հրաժարականներով: Կովկասի ինստիտուտի ղեկավար Ալեքսանդր Իսկանդարյանի խոսքերով, նախորդ տարին չառանձնացավ արտաքին քաղաքական իրադարձություններով: Նա ասաց, որ ղարաբաղյան հակամարտության կարգավորման հարցում ոչ իր սպասելիքները, ոչ էլ հիասթափությունները չխորտակվեցին, որովհետեւ հույսեր չի էլ ունեցել, որ ինչ-որ բան տեղի կունենա.«Դրա համար չկային նախադրյալներ»: Ղարաբաղյան հակամարտությանն առնչվող միակ բանը, ըստ քաղաքագետի, որ տեղի ունեցավ մայիսի 9-ին, Ստեփանակերտում կազմակերպված ռազմական շքերթն էր: Այդ օրը ցուցադրվեց Ղարաբաղի բանակի նորագույն ռազմական տեխնիկան, ինչը, պարոն Իսկանդարյանի կարծիքով, վերջ կդնի այն անիմաստ խոսակցություններին, թե Ադրբեջանը կվաճառի նավթը ու կգնի ուժեղ զինամթերք ու կհաղթի աղքատ Հայաստանին: Պարոն Իսկանդարյանին ուշադիր լսում էր նաեւ գիտաժողովի մասնակից, Ադրբեջանի ներկայացուցիչ «Զերկալո» օրաթերթի քաղաքական վերլուծաբան Ռաուֆ Միրգադիրովը: Նա չընդհատեց կամ չհակադարձեց հայ քաղաքագետին, բայց հասցրեց երկու անգամ թարս նայել նրան:
Արփինե ՍԻՄՈՆՅԱՆ
