ՀՀ մշակույթի եւ Իտալիայի արտաքին գործերի նախարարությունների միջեւ 2011թ-ի ապրիլի 6-ին ստորագրվել էր «Աջակցություն հայկական հաստատություններին՝ տեղական մշակութային ժառանգության պահպանման եւ ամրակայման համար» տեխնիկական պայմանագիրը: Այսօր, մշակույթի նախարարությունում տեղի ունեցած ասուլիսի ժամանակ, մշակույթի փոխնախարար Արեւ Սամուելյանը նշեց, որ կարեւոր հիմնախնդիր է մշակութային ժառանգության պահպանումը եւ արժեւորումը. «Պայմանագրի շրջանակում Երեւանի ճարտարապետության եւ շինարարության համալսարանը համագործակցել է Միլանի պոլիտեխնիկական համալսարանի հետ. ԵՃՇՊՀ-ում անցկացվել են մագիստրոսական դասընթացներ՝ հուշարձանների ճարտարապետական վերականգնման ուղղությամբ»: Փոխնախարարը հավելեց, որ համագործակցությունը ներառում է նաեւ որմնանկարների վերականգնման ուղղությամբ տարվող պրակտիկ դասեր՝ «Էրեբունի» պատմահնագիտական արգելոց-թանգարանում:
ԵՃՇՊՀ պրոռեկտոր Վարդգես Եդոյանը նշեց, որ սկզբնական փուլում բուհում դասավանդել է իտալիայից հրավիրված 14 դասախոս. «Դասընթացները նախատեսված են եղել 12 հոգու համար, սակայն ցանկացողները շատ էին, եւ դասերին մասնակցեցին բակալավրի աստիճան ստացած 32 ուսանող: Ծրագիրը ներառել է նյութագիտության, հուշարձանների չափագրման եւ վերականգնման մասին դասախոսություններ»: Պրոռեկտորը հավելեց, որ ավարտողները ստանալու են ԵՃՇՊՀ-ի եւ Միլանի պոլիտեխնիկական համալսարանների դիպլոմներ: «Մշակութային զարգացման հայ-իտալական ծրագրի» ղեկավար, ճարտարապետ Գայանե Կազնատին նկատեց, որ իտալացի դասախոսները գոհ են հայ ուսանողներից. «Հունիսի 28-ից 15 հոգուց բաղկացած ուսանողական խումբը պրակտիկա կանցնի Էրեբունի թանգարանում՝ որմնանկարների հետազոտման եւ պահպանման ուղղությամբ»:
Հայաստանում Իտալիայի արտակարգ եւ լիազոր դեսպան Բրունո Սկապինին նշեց, որ հայ-իտալական ակտիվ համագործակցության արդյունքում, իտալացի մասնագետները կնպաստեն հայ մասնագետների պատրաստվածության բարձրացմանը. «Պատմական ժառանգության վերականգնումը ենթադրում է նաեւ դրա պահպանություն եւ արժեւորում»,-հավելեց դեսպանը:
Կարդացեք նաև
Լուիզա ՍՈՒՔԻԱՍՅԱՆ
