Այսօր, «Գոլդեն Թուլիփ» հյուրանոցի «Վիվալդի» սրահում տեղի ունեցավ Բոլոնիայի գործընթացի հետամուտ խմբի (ԲԳՀԽ) քարտուղարության` Հայաստանի կողմից պաշտոնական ստանձնման արարողությունը:
Պաշտոնական այցով արտերկրում գտնվող ԿԳ նախարար Արմեն Աշոտյանի անունից ողջունելով հանդիպման մասնակիցներին՝ ԿԳ փոխնախարար Կարինե Հարությունյանը հայտնեց, որ Բոլոնիայի գործընթացի՝ հուլիսի 1-ից ստանձնելիք քարտուղարությունը պատվաբեր է Հայաստանի համար. «Մեր կրթական համակարգը նախկինում չի իրականացրել նման աննախադեպ գործընթաց: 2015թ-ին Հայաստանում տեղի կունենա Բոլոնիայի գործընթացի անդամ երկրների համանախագահների գագաթնաժողովը, որին Հայաստանը հայտ էր ներկայացրել՝ բավարար համարելով իր ֆինանսական եւ մարդկային ռեսուրսները: Ապրիլից մինչ այսօր կառավարությունն իրականացրել է բոլոր նախապատրաստական աշխատանքները»: Տիկին Հարությունյանը հավելեց, որ Բոլոնիայի գործընթացի քարտուղարության ստանձնումը Հայաստանին կտեղափոխի եվրոպական կառույցների հետ համագործակցության նոր հաթակ եւ կնպաստի բուհական համակարգի զարգացմանը:
ՀՀ-ում Եվրոպական Միության պատվիրակության ղեկավար դեսպան Տրայան Հրիստեան նշեց, որ Եվրոպական կրթական տարածում Հայաստանի ներգրավվածությունը նպաստում է ուսումնական հաստատությունների մրցունակության բարձրացմանը. «Tempus» ծրագրի շնորհիվ բուհերը հնարավորություն ունեն բարելավել իրենց վարչական կառուցվածքը եւ նոր ուսումնական ծրագրեր իրականացնել: Գտնում եմ, որ Հայաստանը բավարար կարողություներ ունի՝ եվրոպական կրթական տարածքի հետ փորձի փոխանակման համար »:
ՀՀ-ում Եվրոպայի Խորհրդի գրասենյանկի ղեկավար Սիլվիա Մարիա Զահեի խոսքով՝ կրթական ոլորտում Հայաստանն արդեն իսկ երկարամյա փորձ ունի. «Բրյուսելում աշխատելու ժամանակ գործընկերներիցս մեկն ասաց, որ Հայաստանը ԽՍՀՄ կրթական համակարգի հածանավն է եղել, իսկ այժմ բարեփոխումների նոր փուլում է: Հայաստանի իշխանությունները ցույց են տվել իրենց նվիրվածությունը կրթական ոլորտի զարգացմանը»:
Կարդացեք նաև
Լուիզա ՍՈՒՔԻԱՍՅԱՆ
