Ստամբուլում այսօր որոշվելու են շախմատի համաշխարհային օլիմպիադայի հաղթողներնն ու մրցանակակիրները: Մեզ, բնականաբար, հետաքրքրում է տղաների մրցաշարը, որտեղ Հայաստանի ազգային հավաքականը երրորդ անգամ աշխարհում ուժեղագույնը ճանաչվելու իրական հնարավորություն ունի: Այսօր մեր ընտրանին եզրափակիչ տուրում հանդիպում է Հունգարիայի հետ ու արդեն հայտնի են ըստ խաղատախտակների զույգերը: Առաջին խաղատախտակի առջեւ միմյանց դեմ նստելու են առաջատարները՝ Լեւոն Արոնյանն ու Պետեր Լեկոն: Ի դեպ, Լեկոն Հայաստանի ազգային հավաքականի մարզիչ Արշակ Պետրոսյանի փեսան է, դստեր՝ Սոֆիայի ամուսինը եւ Սոֆիան Պետերին ուղեկցում է նրա մասնակցությամբ բոլոր մրցումներում՝ աշխարհի որ ծայրում էլ լինի: Երկրորդ խաղատախտակի առջեւ հանդիպում են Զոլթան Ալմաշին եւ Սերգեյ Մովսիսյան, երրորդի՝ Յուդիթ Պոլգարն ու Վլադիմիր Հակոբյանը, չորրորդի՝ Ֆերենց Բերկեսն ու Գաբրիել Սարգսյանը:
Հիշեցնենք, որ վճռորոշ տուրից առաջ Չինաստանը, Հայաստանը եւ Ռուսաստանն ունեն 17-ական թիմային միավոր եւ մրցաշարային աղյուսակում նույն հաջորդականությամբ դասավորված են անհատական միավորներով:
Աշոտ ՀԱԿՈԲՅԱՆ