Զգուշությամբ կանգնելով ծառին ամրացված հազիվ մեկ ոտաչափ պարանի վրա`վանաձորցի 21-ամյա Մետաքսյա Համբարյանը փորձում է երկու ձեռքով պահել հավասարակշռությունն ու որքան հնարավոր է գետնից կտրված մնալ:
Սակայն շուտով պարանի դողոցները ավելանում են, ու Մետաքսյան ստիպված ցած է իջնում:
Վանաձորցի աղջիկը մեկն է այն երիտասարդներից, ով առանց երկմտելու որոշել է մարմնի ճկունությունը մարզել «Սլեքլայն» մարզաձեւում:
Կարդացեք նաև
Այսուհետ լոռեցի երիտասարդները կարող են իրենց ազատ ժամանակը ակտիվ անցկացնել:
Շաբաթական երկու օր «Սլեքլայն» մարզաձեւը կայցելի Վանաձոր համայնք, մեկական օր էլ Ստեփանավան, Սպիտակ, Ալավերդի քաղաքներ:
Նախաձեռնությունն Lori Travel Club – ինն է: Ծրագրի իրականացմանը օժանդակել են Երիտասարդական բանկն ու Հայաստանի ալպինիզմի եւ լեռնային տուրիզմի ֆեդերացիան:
«Սա որոշ չափով կխթանի մարզի երիտասարդների ակտիվությանը, նրանց ժամանցի կազմակերպմանը»,-ասում է Lori Travel Club-ի հիմնադիր նախագահ Գեւորգ Վարդանյանը:
«Ողջունելի է, շատ տպավորված եմ, ճիշտ է , առաջին փորձս այդքան էլ հաջողություն չունեցավ, սակայն պարապմունքները կօգնեն, որ կարողանամ պարանի վրա առանց ոտքի դողալու կանգել, հետագայում նաեւ որոշ համարներ պատրաստել: Սա եւս մեկ առիթ է ակտիվացնելու երիտասարդներիս, մեր առօրյան հետաքրքիր դարձնելու»,-իր տպավորություններ է կիսում Մետաքսյա Համբարյանը` նկատելով, որ ժամանակն է մի փոքր էլ ուշադրությունը Երեւանից տեղափոխել մարզերի երիտասարդների վրա:
Անուշ ԲՈՒԼՂԱԴԱՐՅԱՆ
Վանաձոր
