Ֆրանսիայում 2013-ի տարեմուտի գիշերը այրել են 1193 ավտոմեքենա, այդ մասին հաղորդել է Agence France-Presse-ը:
Բացի այդ, Ֆրանսիայի ներքին գործերի նախարար Մանուել Վալսի խոսքերով` նույն գիշերվա ընթացքում ողջ երկրով մեկ անկարգությունների ընթացքում ոստիկանների հետ բախումների արդյունքում վիրավորվել է յոթ ոստիկան:Ընդհանուր առմամբ ողջ երկրով մեկ Ամանորի գիշերը կարգուկանոն հաստատելու նպատակով աշխատում էր մոտ 65 հազար ոստիկան: Նախարարի խոսքերով` Ֆրանսիայում Նոր տարվա եւ Բաստիլի գրավման (հուլիսի 14-ին) տոնակատարությունների ժամանակ հաճախ են տեղի ունենում մեքենաների զանգվածային հրկիզումներ: Այսպես, 2010թ. հունվարի 1-ի գիշերը երկրում հրկիզել են 1137 մեքենա, դրանից մեկ տարի առաջ` 2009-ի հունվարի 1-ին, այրվել է 1147 մեքենա:
2010թ. ամռանը Բրիս Օրտեֆեն, որն այն ժամանակ զբաղեցնում էր Ֆրանսիայի ներքին գործերի նախարարի պաշտոնը, հայտարարեց իր որոշման մասին` դադարեցնել մեքենաների հրկիզումների հաշվարկի մասին տեղեկատվության բաց եւ հանրամատչելի հրապարակումը: Օրտեֆեն կարծում էր, որ այդ տեղեկատվությունը միայն խթանում է հակընդդեմ խմբավորումներին` մրցակցության մեջ մտնել մեկ-մեկու հետ, թե ով ավելի շատ մեքենա կայրի: Սակայն ներկայիս նախարար Մանուլ Վալսը 2012 թ. դեկտեմբերի 31-ին հայտարարեց այն մասին, որ սրանից հետո ՆԳՆ-ն մշտապես կհրապարակի տոնական օրերի անկարգությունների մասին հաշվետվությունները, քանի որ «Ֆրանսիայի ժողովուրդը պետք է իմանա ողջ ճշմարտությունը»:
