Այսօր` հունվարի 6-ին, ավտովթար է տեղի ունեցել Երևանում: Ժամը 00:10-ի սահմաններում Երևան քաղաքի բնակիչ 27-ամյա Էդգար Ռենյովը, վարելով «Օպել Աստրա» մակնիշի 33ՕU 347 համարանիշի ավտոմեքենան, Հերացի փողոցից դեպի Խանջյան փողոց ընթանալիս` թունելից դուրս գալիս ՀՀ ոստիկանության վարչական շենքի մոտ բախվել է բաժանարար բետոնե պատին և գլխիվայր շրջվել: Ինչպես հայտնում է ֆոտոլրագրող Գագիկ Շամշյանը, վթարի հետևանքով, բարեբախտաբար, զոհեր և վիրավորներ չեն եղել:
Վարորդը, ով գտնվում էր ոչ սթափ վիճակում, չէր ենթարկվում ոստիկանության և շտապ օգնության աշխատակիցներին: Ավտոմեքենայում հայտնաբերվել են նաև գարեջրի օգտագործված շշեր: Ֆոտոլրագրողը հայտնում է, որ գրեթե 1 ժամ նրան համոզում էին, որ հասարակական կարգը չխախտի: Նրան անգամ չկարողացան կարգի հրավիրել դեպքի վայր ժամանած անձինք, ովքեր ներկայացան որպես վարորդի հարազատներ:
Այնուամենայնիվ, ոստիկանները նրան բերման ենթարկեցին ոստիկանության կենտրոնական բաժին, իսկ ավտոմեքենան տեղափոխվեց ՃՈ հատուկ պահպանման տարածք: Վարորդը տեղափոխվել է բժշկական կենտրոն՝ պարզելու նրա սթափության աստիճանը:
Լուսանկարները՝ Գագիկ Շամշյանի
