Այսօր Aravot.am-ը ՀՀԿ պատգամավոր Համլետ Հարությունյանից հետաքրքրվեց՝ Դուք երկար տարիներ ՀՀԿ-ի թիմում եք,վիրավորված չե՞ք զգում, որ Ձեր վաստակը «Լեքսուսային» արժեքով չի գնահատվում:
«Իմ վաստակը իմ գրած գրքերն են»,- պատասխանեց Համլետ Հարությունյանը՝ շարունակելով,- «Իմ ընկերոջ մասին նոր գիրք եմ գրել, նոր լույս է տեսել: Տարուն հասցրել եմ: Հետո ես ամեն ինչ ունեմ երջանիկ ապրելու համար՝ տուն ունեմ, երեխաներ ունեմ, թոռներ ունեմ, բարձր աշխատավարձ եմ ստանում, տղաս աշխատում է: Ասենք, շվեյցարական բանկում էլ մի քանի միլիարդ դոլար ունենամ: Ի՞նչ տարբերություն կա»: Պարոն Հարությունյանը այս խոսքերից հետո ճշտեց՝ մարդկայի՞ն զրուցենք, թե՞ գրելու համար ես հարցնում: Երբ տեղեկացրեցինք, որ հրապարակելու ենք, նա այսպես շարունակեց իր միտքը. «Դե, գրելու համար ասեմ՝ ես ամեն ինչ ունեմ: Իմ ամենամեծ հարստությունն այն է, որ ես իմ ժողովրդին այսքան՝ մի քիչ ծառայել եմ»:
Ինչ վերաբերում է ՀՀԿ-ական իր այն թիմակիցներին, որոնք շքեղ ավտոմեքենաներով են շրջում, խոշոր կապիտալ են կուտակում, սուպերմարկետներ, օբյեկտներ՝ Համլետ Հարությունյանը վստահեցրեց, որ նման բաներ չունի, քանի որ նախանձ չէ. «Իմ ամենամեծ թերությունը, որ ես ունեմ, նախանձ չունենալն է: Անկեղծորեն եմ ասում: Եթե նախանձ չի ունենում մարդ, ինքը չի կարող հարստություն կուտակել: Ես նախանձ չեմ ունեցել ծնված օրից մինչեւ հիմա: Ես այնպիսի կյանք եմ ունեցել, որ բարեբախտաբար առիթ չեմ ունեցել որեւիցե մեկին նախանձելու»:
Հռիփսիմե ՋԵԲԵՋՅԱՆ
Կարդացեք նաև
