«Դուք ասում էիք, որ Գագիկ Ծառուկյանը մատնոցի նման բոլորին ֆռռացնում է, չի ասում շարիկը ում տակն է, իսկ այսօր ասում եք, որ Գագիկ Ծառուկյանին ահաբեկել են»,- Aravot.am-ի այս հարցին Քաղաքագետների միության նախագահ Հմայակ Հովհաննիսյանը պատասխանեց. «Դա մարգարեական կանխատեսում էր, որն իրականացավ: Երեք նախագահներն էլ խաբված են Գագիկ Ծառուկյանից: Ռոբերտ Քոչարյանը խաբված էր, որովհետեւ ինքը մրցակցային ընտրությունների անցկացման, մրցակցային իրավիճակի ստեղծման կողմնակից է եւ գտնում էր, որ մրցակցային պայմանները պետք է ստեղծվեն հենց ԲՀԿ-ի ակտիվ մասնակցության միջոցով: Նա խաբվեց իր սպասումներում: Սերժ Սարգսյանը գտնում էր, նրան դա լավ էր համոզել Հովիկ Աբրահամյանը, որ վերջին պահին Գագիկ Ծառուկյանը կհայտարարի, որ ինքը նախագահին, իր ստորագրությանը հավատարիմ է մնում, որը դրել է 2011-ին հուշագրի տակ եւ պաշտպանելու է Սերժ Սարգսյանին, ինչը չեղավ: Սա Սերժ Սարգսյանի համար իսկապես անակնկալ էր, որովհետեւ ինքը համոզված էր դրանում, եւ ՀՀԿ-ականները միեւնույն դիրիժորի փայտիկի զարկով հայտարարում էին, որ Գագիկ Ծառուկյանը կպաշտպանի Սերժ Սարգսյանին: Իսկ Լեւոն Տեր-Պետրոսյանը հույս ուներ, որ ոգեւորված իր քաղաքագիտական վերլուծություններից՝ Գագիկ Ծառուկյանը կպաշտպանի իր թեկնածությունը: 3-ն էլ, այս 3 մատնոցներն էլ խաղացրեց շատ հմտորեն, շարիկը վերջում պահեց իր գրպանում եւ ասեց՝ ես բոյկոտում եմ: Այսինքն, այդ բոյկոտը չէր մտնում այդ ծրագրերի մեջ»
Մեր հարցին՝ բայց չստացվե՞ց, որ շարիկը Սերժ Սարգսյանի գրպանում էր՝ նա պատասխանեց. «Չէ: Սերժ Սարգսյանը հասկացավ, որ Գագիկ Ծառուկյանը կամ ինքը պետք է մասնակցի ընտրությանը, կամ լավագույն դեպքում չմասնակցի եւ իրեն չպաշտպանի: Չարյաց փոքրագույնը իր համար դա էր: Օրուելի «1984»-ի պես հիմա Գագիկ Ծառուկյանին տան՝ կստորագրի, որ ինքը անգլիական մեծախոսության թշնամի է, մենակ թե իրեն կատոկի տակ չգցեն, ինչի՞ մասին է խոսքը: Սա տոտալիտար համակարգի առանձնահատկությունն է՝ ցավի դեմ խաղ չկա: Օրուելը դա ցույց է տալիս»:
Հռիփսիմե ՋԵԲԵՋՅԱՆ
