Դուք ամեն օր ոտքով Մարաշից իջնում եք կենտրոն, դա առողջությա՞ն համար եք անում, մարդկանց հետ շփվելո՞ւ, թե այլ բանի համար: Aravot.am-ի հետ զրույցում մեր այս հարցին ի պատասխան «Ժառանգություն» կուսակցության առաջնորդ Րաֆֆի Հովհաննիսյանը ճշտեց. «Ամեն օր չէ: Արդեն մի քանի տարի է, որ փորձում եմ առողջ ապրել, մարզված լինել, թեեւ միշտ չէ, որ ստացվում է: Ես նախընտրում եմ քայլել, եթե ուշանում եմ՝ հանրային տրանսպորտ նստել: Բայց քայլելը նաեւ հնարավորություն է տալիս մաքուր օդ շնչել, մարզվել, եւ, իհարկե, եթե քաղաքացի կա, որ իր պահանջը ունի, քննադատությունը, խնդրանքը, մեկ-մեկ նաեւ՝ զորակցության արտահայտումը, դա ինձ համար անհրաժեշտ է: Բայց PR նոր շրջանառությունը, որ կա՝ Րաֆֆին գնաց ինքնաթիռի մեջ ինչ-որ մի բան արեց, եւ դա PR էր, մինչդեռ ինքը գնում էր հորը շնորհավորելու, Րաֆֆին գնաց Բաքու՝ ինչ-որ բան անելու համար, թեեւ Բաքու ես հրավիրված էի… Կյանքում որոշ բաներ լինում են իսկապես՝ բնական, առանց որեւէ մեկի պլանավորման, եւ հատուկ նպատակ չի հետապնդում: Իմ քայլելը Երեւանի փողոցներում՝ դա իմ բնական վիճակն է: Մի քիչ դժվարանում եմ ձմռանը, մեկ-մեկ սահում եւ ընկնում եմ, ուրախ եմ, որ դուք չեք արձանագրում այդ պահը: Կարող եմ նաեւ ընկնել: Այդ ցավը ինձ նաեւ ուժ է տալիս»:
Հռիփսիմե ՋԵԲԵՋՅԱՆ
Կարդացեք նաև
