Հատուկ կարիքավոր մարդիկ ընտրել չեն կարողանում
«Դե թող մի հազար ձայն էլ խախտվի»,- տարիներ առաջ այսպիսի պատասխան էր տվել մտավոր արատներ ունեցող մարդկանց խնդիրներով զբաղվող կազմակերպության ղեկավար Արփինե Աբրահամյանի բարձրացրած խնդիրներին ՕԵԿ-ական պատգամավոր Գագիկ Ավետյանը: Այսօր «Կոնգրես» հյուրանոցում հատուկ կարիք ունեցող մարդկանց խնդիրներով զբաղվող հասարակական կազմակերպությունների ղեկավարներն իրենց մտահոգութուները կիսեցին ՀՀ նախագահի թեկնածու Սերժ Սարգսյանի շտաբի պետ, ԱԺ նախագահ Հովիկ Աբրահամյանի հետ:
Արփինե Աբրահամյանը տեղեկացրեց, որ մտավոր խնդիրներ ունեցող մարդկանց հաճախ նույնացնում են հոգեկան խնդիրներ ունեցող մարդկանց հետ, ինչը շատ սխալ է: Մտավոր խնդիրներ ունեցող մարդկանց հետ թույլ չեն տալիս, որ այլ մարդ մտնի ընտրության, արդյունքում տվյալ մարդն ուղղակի զրկվում է ընտրության իրավունքից:
Ի դեպ, ընտրելու իրավունք ունեցող հատուկ կարիքավոր մարդիկ կազմում են ընտրողների վեց տոկոսը: Ներկաները պատմեցին, որ տարբեր առիթներով դիմել են կուսակցություններին, որոնց արձագանքից այդքան էլ բավարարված չեն: Շատերը նամակով պատասխանել են, որ համամիտ են բաձրացված հարցերի հետ, սակայն ընդառաջ չեն գնացել: Գործնական արձագանքել է ՀՀԿ-ն: Հորդորեցին, որ հանդիպումները ընտրությունից ընտրություն չլինեն:
Կարդացեք նաև
Ներկաներին հուզում էին նաեւ հատուկ կարիքավոր մարդկանց ընտրատեղամասեր, ԿԸՀ մուտք գործելու հնարավորությունները, աշխատանքի տեղավորման հարցը: Առաջարկ հնչեց գոնե ժամանակավորապես վերականգնել շրջիկ քվեատուփերի ինստիտուտը: Խոսվեց նաեւ թեկնածուների ծրագրերի սուրդոթարգմանության անհրաժեշտութան, ինչպես նաեւ հատուկ կարիքավոր մարդկանց տեղաշարժի խնդիրների մասին: Դրական գնահատվեց, որ Սերժ Սարգսյանի ծրագիրն աուդիո տարբերակով էլ կա:
«Փյունիկ» միության նախագահ Հակոբ Ասատրյանը կարեւորեց պարաօլիպիկ սպորտի զարգացումը, ասաց, որ ունենք մարզիկներ, որոնց կարող ենք միջազգային ասպարեզ հանել եւ այդպիսով էլ Հայաստանը ներկայացնել: Նա օրինակ բերեց հարեւան Ադրբեջանին, որտեղ հաշմանդամային սպորտի զարգացման համար տարեկան 14 միլիոն դոլար է ծախսվում: Մինչդեռ մեր երկրում այդ թիվը կազմում է ինը միլիոն դրամ, այն էլ բաժանվում է չորս կազմակերպությունների միջեւ, ինչն էլ անարդյունավետ է դարձնում դրանց ծախսումը: 2013-ի բյուջեով առաջարկվել էր 25 միլիոն դրամ տրամադրել, բայց պատկան նախարարությունը մերժել էր: «Փյունիկի» ղեկավարը դա պայմանավորում է սպորտի կուսակցականացմամբ: Իր պատասխան խոսքում ԱԺ նախագահն ասաց, որ նման միտում չի տեսել:
Հարց բարձրացվեց մարզերում բնակվող հաշմանդամների խնդիրներին առավել մեծ ուշադրություն դարձնելու մասին, քանի որ ի տարբերություն մայրաքաղաքաբնակների, նրանց խնդիրներն առավել շատ են: Կարեւորվեց նոր օրենքի ընդունումը, որն այժմ քննակվում է կառավարությունում, եւ որտեղ, նշված խնդիրներից շատերին լուծում է առաջարկվում:
Նելլի ԳՐԻԳՈՐՅԱՆ
