ՀՀ ոստիկանության Մալաթիայի քննչական բաժնում այսօր հարուցվել է քրեական գործ` լրագրողի մասնագիտական օրինական գործունեությանը խոչընդոտելու դեպքի առթիվ: Ինչպես մեզ հայտնի դարձավ հավաստի աղբյուրներից, 2013թ. հունվարի 30-ին, ժամը 21-ի սահմաններում ՀՀ ԿԱ ոստիկանության ճանապարհային ոստիկանության հատուկ պահպանվող տարածքում Ռուսլան Վանիկի Սահակյանը և գործով չպարզված ևս մեկ անձ խոչընդոտել են լրագրող Գագիկ Գևորգի Շամշյանի մասնագիտական գործունեությանը, որի ընթացքում տալով սեռական բնույթի հայհոյանքներ, դիտավորությամբ կոպիտ կերպով խախտել են հասարակական կարգը, ինչը զուգորդվել է Շամշյանի նկատմամբ բռնություն գործադրելու սպառնալիքով:
Վերոնշյալ դեպքի առթիվ ոստիկանությունում հարուցվել է քրեական գործ` ՀՀ քրեական օրենսգրքի 164-րդ և 258-րդ հոդվածների հատկանիշներով, Գ. Շամշյանը ճանաչվել է որպես տուժող, իսկ Ռուսլան Սահակյանը որպես կասկածյալ: Վերջինս ձերբակալվել է, նախաքննությունը շարունակվում է:
«Փաստինֆո»
