Հրազդանում ոստիկանները արգելել են նախկին ոստիկան Մխիթար Ալումյանին մոտենալ ՀՀ նախագահ, նախագահի թեկնածու Սերժ Սարգսյանին: Ոստիկանները առավոտից հսկում են Ալումյանին, իսկ Սերժ Սարգսյանի թիկնազորի անդամներից մեկը, ինչպես Aravot.am-ին պատմեց Ալումյանը, մոտեցել է եւ հորդորել չմոտենալ նախագահին. Նրա ժամանակը սուղ է եւ նախկին ոստիկանի համար ժամանակ չունի:
Մեզ հետ զրույցում Մխիթար Ալումյանը պատմեց, որ այսօր առավոտից սպասում է, որ Սերժ Սարգսյանի Հրազդան մտնելուն պես մոտենա նախագահին եւ հիշեցնի նրա տված այն խոստումը` Ալումյանի տարիների վաստակած աշխատավարձը ոստիկանությունը պարտավոր է վճարել, ինչը մինչ օրս չի կատարվել:
Aravot.am-ի հետ զրույցում Մխիթար Ալումյանը վստեհեցրեց, որ առավոտից նաեւ Հրազդան քաղաքի, իր իսկ խոսքերով ասած` թաղայինների ղեկավար Սողոմոնյանը նրան կիսասպառնալիքով եւ կիսահորդորով ասել է, որ հանկարծ չհամարձակվի մոտենալ նախագահին եւ աղմուկ բարձրացնի. «Լիքը ոստիկաններ մոտ 3 մետր շառավղով կողերը ֆռֆռում են, չեն թողնում մոտիկ գնամ»:
Կարդացեք նաև
Հիշեցնենք, որ Ալումյանն արդեն երկար ժամանակ է պայքարում է, որպեսզի ոստիկանությունից ստանա իր 10 հազար ժամ արտաժամյա աշխատանքի 6,5 միլիոն դրամ աշխատավարձը, ինչը սակայն անհասկանալի պատճառներով ձգձգվում է, այն էլ այն դեպքում, երբ հատուկ քննչական ծառայությունն էլ հասատատել է, որ Ալումյանն իսկապես աշխատել է պարեկապահակային ծառայությունում:
Ալումյանը պահանջում է այդ գումարը անհապաղ վճարեն, քանի որ իր հիվանդ դստեր` 11 ամյա Կարինեի փրկության համար որոշել են ուխտի գնալ Երուսաղեմ:
Այսօր Ալումյանն ուզում էր նախագահին անձամբ ներկայացնել խնդիրը, ինչը սակայն խոչընդոտել են Սերժ Սարգսյանի ենթականներն ու ոստիկանները` պատճառաբանելով, որ նախագահը եկել է ոչ թե քեզ տեսնելու, այլ ժողովրդին: Այս պահին Ալումյանը, իր վստահեցմամբ` ջանքեր է գործադրում, որպեսզի իր խոսքը հասցնի ՀՀ նախագահ Սերժ Սարգսյանին:
Նելլի ԲԱԲԱՅԱՆ
