Ըստ նրա, այսօրվանից պետք է կորի Սերժ Սարգսյանի հանգիստ քունը
Րաֆֆի Հովհաննիսյանի կազմակերպած հանրահավաքի ժամանակ ելույթ ունեցավ նաեւ Նիկոլ Փաշինյանը, ում ելույթից առաջ հանրությունը գոռում էր՝ Նի-կոլ, Նի-կոլ: Նիկոլ Փաշինյանը ուղղեց. «Րաֆֆի Հովհաննիսյանը չի՞ ասել, որ անուններ չենք գոռում»: Րաֆֆի Հովհաննիսյանը համաձայնեց՝ ժպտալով:
Ըստ Նիկոլ Փաշինյանի, ինքն էլ է լսել, որ գյուղերում լուրեր են տարածվել, թե այսօրվա հանրահավաքը չի կայանալու. «Բա էս որ չկայացած հանրահավաքն ա, բա կայացա՞ծը որն է»,- ասաց նա՝ նկատի ունենալով Ազատության լիքը հրապարակը:
Կարդացեք նաև
Նիկոլ Փաշինյանը նաեւ իր ելույթում նշեց, որ որեւէ քաղաքական տերմինով չենք կարող ներկայացնել այսօրվա ստեղծված իրավիճակը, երբ ԿԸՀ-ն չի ընդունում ընտրությունների իրական արդյունքները. «Ի դեպ, երեկ նա իր աշխատասենյակում ընդունել էր Սերժ Սարգսյանին եւ ոչ թե հակառակը: Ստեղծված է օլոմբա քաղաքական իրավիճակ, այսիքն, որոշակի հավասարակշռություն այնուամենայնիվ ժողովրդին հաջողվել է ստեղծել շատ ծանրակշիռ հակակշիռ՝ Սերժ Սարգսյանի վարչախմբին: Կողմերից մեկը, որը կանի հախուռն, հապճեպ գործողություններ, նա տանուլ կտա: Մենք պետք է անենք կոնկրետ արձանագրում: Մենք ունենք մինիմում ծրագիր՝ չպարտվել: Ժողովուրդը չպետք է պարտվի: Ինչ է պետք անել այդ պարտությունը թույլ չտալու համար՝ չտալ որեւէ հնարավորություն, որ հրոսակախումբը փորձի ձեռնարկել ժողովրդի նկատմամբ: Այս տարբերակը պետք է ի սկզբանե բացառել: Մենք դա կարող ենք անել ու կանենք: Երկրորդը՝ չգնալ որեւէ պայմանավորվածության ապօրինի հանցագործ իշխանության հետ: Որեւէ պայմանով, որեւէ ակնարկով չճանաչել Սերժ Սարգսյանի իշխանությունը: Սերժ Սարգսյանը չի եղել ու չի էլ լինի երբեք Հայաստանի Հանրապետության նախագահ: Ուրեմն սա մեր ծրագիրը պետք է լինի, Ազատության հրապարակի նվազագույն ծրագիրը: Ծրագիր առավելագույնը սա է՝ Րաֆֆի Հովհաննիսյանը դե յուրե պետք է նշանակվի Հայաստանի Հանրապետության նախագահ: Պետք է ծայրահեղ բաց, ազնիվ եւ անկեղծ նա լինի ՀՀ ժողովրդի հետ: Քաղաքական պրոցեսները պետք է տեղավորվեն կատարյալ թափանցիկության եւ հրապարակայնության շրջանակներում: Չեմ էլ կասկածում, որ այդպես էլ կլինի: Հաջորդը՝ պետք է Սերժ Սարգսյանը ոչ մի հանգիստ գիշեր չանցկացնի՝ այսօրվանից սկսած: յուրաքանչյուր հաջորդ օրը նրա համար պետք է լինի անկանխատեսելի: Նա այսօրվանից պետք է ապրի նույնիսկ իր ապօրինի իշխանությունը կորցնելու վախը ստում: Այսօրվա հրապարակն արդեն իսկ ապահովում է դա: Այս հրապարակը, որ տեսանելի է Սերժ Սարգսյանի համար, ՀՀ-ում պետք է տեղի ունենան Սերժ Սարգսյանի համար անտեսանելի պրոցեսներ: Այդ պրոցեսները պետք է ՀՀ քաղաքացու գիտակցության մեջ լինեն: Սերժ Սարգսյանը այլեւս տեղ չպետք է ունենա մեր գլխում, մեր գիտակցության մեջ: Սերժ Սարգսյանին պետք է մոռանալ որեւէ պաշտոնական դերակատարության մեջ»:
Նա նաեւ նշեց, որ Սերժ Սարգսյանի եւ նրա իշխանության տակից պետք է դուրս հանել Հայաստանի Հանրապետությունը եւ այնպես անել, որ նա այլեւս կառավարելու ոչինչ չունենա, բացի իր հեռացումը:
Հռիփսիմե ՋԵԲԵՋՅԱՆ
Մեծ հույսեր, մեծ սպասելիքներ, աստծու օրհնությանբ: