Մեկնարկում է «Թատրոն–X» 6-րդ հանրապետական փառատոնը
ՀՀ Մշակույթի նախարարության աջակցությամբ Ազգային թատերական ստեղծագործական միավորումը ապրիլի 10-ից մայիսի 2-ը անցկացնում է «Թատրոն-X» 6-րդ հանրապետական փառատոնը, որին մասնակցում են հայաստանյան 17 թատրոններ եւ թատերախմբեր: Ինչպես այսօր Մշակույթի նախարարությունում լրագրողներին հայտնեց փառատոնի նախագահ Արա Խզմալյանը, փառատոնի բյուջեն վերանայվել է, ինչի շնորհիվ հնարավոր է դարձել ապահովել նաեւ մարզային փուլը: «Այս անգամ անցկացվում է երիտասարդ բեմադրիչների աջակցության ծրագիր, որն արդյունավետ մեխանիզմ է: Բացի այդ, որոշել ենք ընդգծել փառատոնի սոցիալական նշանակությունը` ներգրավելով այն մարդկանց, ովքեր սոցիալական տարբեր խնդիրների պատճառով չեն կարողանում ներկա գտնվել ներկայացումներին»,-ասաց Արա Խզմալյանը:
Նա նաեւ փաստեց, որ ուրախալի հանգամանք է տեղական ինքնակառավարման մարմինների ցուցաբերած հետաքրքրությունը փառատոնի հանդեպ:
Մշակույթի փոխնախարար Արթուր Պողոսյանը նշեց, որ ավանդական դարձած փառատոնը թատերական ոլորտի կարեւոր միջոցառումներից է, որի գաղափարախոսության հիմքում ընկած է թատերական ոլորտի խնդիրների վերհանումը. «Այն իրենից ներկայացնում է բանավեճի փառատոն, որը միտված է տարվա ընթացքում պետական եւ մասնավոր թատրոնների գործունեությունը ուսումնասիրել, այլեւ քննարկել դրանց հետ կապված գեղարվեստական խնդիրները, առաջարկություններ ներկայացնել, որպեսզի տվյալ թատրոնը կամ կոլեկտիվը ավելի լավ ներկայացումներ բեմադրի»:
Կարդացեք նաև
Փոխնախարարը հայտնեց, որ քիչ է կարեւորվում ներկայացումների մասնագիտական որակը. «Իհարկե դա ցանկալի է` արձանագրելու համար, թե տարվա ընթացքում թատերական դաշտում ինչ դրական զարգացումներ ենք ունեցել, բայց առավել կարևոր է հասկանալ, թե ոլորտն ինչ ուղղությամբ է գնում, եւ ինչ խնդիրներ են ի հայտ գալիս»:
Պարոն Պողոսյանի փոխանցմամբ` յուրաքանչյուր ներկայացումից հետո մասնագիտական լուրջ քննարկումներ կկազմակերպվեն` խնդիրները ներկայացնելու համար:
Փառատոնի մասնագիտական հանձնախմբի անդամներից Լևոն Մութաֆյանը արձանագրեց, որ հատկապես մարզերում նկատվում է հանդիսատեսի հոսքը դեպի թատրոն:
Լուիզա ՍՈՒՔԻԱՍՅԱՆ
