Դալմայի այգիների հողօգտագործողների ժառանգ, «Դալմա-սոնա» հիմնադրամի նախագահ Ռուզաննա Ղազարյանն այսօր նախկին քաղաքապետ, ՀԱԿ քաղաքապետի թեկնածու Վահագն Խաչատրյանի հետ հանդիպման էր եկել կառավարության 1991 թվականի որոշումը ձեռքին:
Նրա խոսքերով, հենց այդ որոշմամբ է կառավարությունը հողամասերը բաշխել հողօգտագործողներին, իսկ որոշման դրույթներում էլ հստակ նշել էր, որ հողօգտագործողներից հողամասը ետ չի վերցնելու, թեեւ դեռ այն ժամանակ տվել էին վարձակալության պայմաններով: «Հետ վերցնելու պարագայում մեզ պետք է տրվեր համարժեք հողամաս կամ համարժեք արդարացի փոխհատուցում, առայսօր համարժեք հողամասի մասին իշխանությունները լսել անգամ չեն ուզում: Փոխհատուցումը սկսել են, սակայն դա չես կարող համարել արդարացի, որովհետեւ կառավարությունը այլ գումարներով է առքուվաճառքը իրականացնում: Մինչեւ անգամ 2 դոլարով ստացող է եղել, մեզ ասել են 10 դոլարի սահմանում»,- պատմեց տիկին Ղազարյանը:
Նրա խոսքերով, իր հողամասը 4000 մետր տարածք էր, կողքից 1000 մետր տարածք տվել էին անջրդի:
Տիկին Ղազարյանը արդարացի փոխհատուցման գործընթացի ավարտն է ուզում տեսնել, հետո զբաղվել Դալմայից մնացած այգիների պաշտպանությամբ. «Եթե այդտեղ ծառ չի լինելու, միայն շինություններ են, Երեւանը ինչո՞վ է օդը մաքրելու, չգիտեմ»:
Նա խնդրի լուծումը կապում է ոչ թե քաղաքապետի թեկնածուների, այլ երեւանցիների գիտակցության մակարդակի բարձրացմամբ. «Սա միայն հողօգտագործողի խնդիրը չէ, այսպես թե այնպես տեղական, թե միջազգային դատարաններում նրանց փոխհատուցում տալու են, սակայն թե ոնց է լուծվելու ծառերի, թթվածնի զտման հարցը, չգիտեմ: Երեւանցիները պետք է զբաղվեն այդ հարցով»:
Արփինե ՍԻՄՈՆՅԱՆ
