Ծառատունկ` Գեղարվեստի ավագ դպրոցում
Այսօր վաղ առավոտից «Մխիթար Սեբաստացի» կրթահամալիրի ավագ դպրոցի տարածքում ընթանում են բարեկարգման աշխատանքներ, որոնց շրջանակում կազմակերպվեց ծառատունկ` Եղեռնի զոհերի հիշատակը հավերժացնելու եւ հարգանքի տուրք մատուցելու նպատակով:
Գեղարվեստի ավագ դպրոցի ղեկավար Լուսինե Մանուկյանը Aravot.am-ի հետ զրույցում նշեց, որ «Մեր միջավայրը` մեր ձեռքերով» նախագիծն ընթանում է արդեն մի քանի տարի. «Սովորողներն իրենց ձեռքերով ստեղծում են այն միջավայրը, որը կուզենային տեսնել: Աշխատել ենք քայլ առ քայլ եւ այսօր արդեն ստեղծել ենք կանաչ տարածք, մինչդեռ նախորդ տարի այստեղ ավերակ էր` շինարարական աղբով լցված: Ամեն ինչ հավաքել ենք, կարգավորել եւ հարթեցրել, իսկ այսօր աշխատանքի վերջին փուլն ենք իրագործում»:
Կարդացեք նաև
Լուսինե Մանուկյանի փոխանցմամբ` օրվա ընտրությունը պայմանավորված է այն հանգամանքով, որ Եղեռնի զոհերի հիշատակը ցանկանում են հավերժացնել ոչ միայն սգալով, խոսքերով եւ Ծիծեռնակաբերդում հարգանքի տուրք մատուցելով, այլեւ նմանատիպ ստեղծարար աշխատանքով. «Օրվա խորհրդին ընդառաջ` այսօր 24 ծառ ենք տնկելու` կեռասենի, բալենի, սալորենի, եւ փորձելու ենք տարածքը ավերակից դրախտի վերածել»:
Մեր զրուցակիցը փաստեց, որ աշակերտներն ակտիվ են եւ ոգեւորված: «Ամբողջ աշխատանքը նրանք են արել, իսկ մենք ուղղորդել ենք: Բոլորն էլ քաղաքի երեխաներ են եւ նախկինում հողը մշակելու աշխատանքներ չէին կատարել: Սակայն ներկայումս ձեռք են բերել բոլոր հմտությունները: Աշխատանքը սիրով են անում, բացի այդ` այն ուսուցման մեթոդ է, որը սովորեցնում է աշխատել հողի հետ եւ տալիս միջավայրը փոխելու հմտություններ»,-հավելեց Լուսինե Մանուկյանը:
«Պարտեզ ասելով` պետք չէ հասկանալ միայն այս հատվածը, որովհետեւ ամբողջ դպրոցն է արդեն այս կարգավիճակում: Պարզապես սա ամենաանմխիթար վիճակում գտնվող տարածքն էր, որը հոգատար ձեռքերի կարիք էլի կունենա: Աշխատանքը շարունակական է լինելու, իսկ տրամադրվածությունը ամբողջ կրթահամալիրում է տիրում եւ ուսումնական պրոցեսի մի փոքրիկ օղակն է»,-մեզ հետ զրույցում ասաց Գեղարվեստի ավագ դպրոցի կազմակերպիչ, էկոլոգիայի դասավանդող Գայանե Առաքելյանը:
Լուսինե Մանուկյանի խոսքով` Եղեռնի զոհերի հիշատակը միայն սգալով եւ ողբալով չեն հարգում. «Ուզում եմ, որ մեր սովորողների միջից դուրս գա սգավորի եւ ողբացողի կերպարը, այսինքն` մենք ուժեղ ենք, ստեղծող եւ առաջ ենք գնում` իհարկե հարգելով այդ ամենը»:
Լուիզա ՍՈՒՔԻԱՍՅԱՆ
