Հելսինկյան քաղաքացիական ասամբլեայի Վանաձորի գրասենյակի ներկայացուցիչներն այսօր այցելել են Վ. Սարգսյանի անվան ռազմական ինստիտուտում նախօրեին միջադեպի արդյունքում սպանված Սիփան Մովսիսյանի հարազատներին:
Ասամբլեայի խաղաղասիրական բաժնի համակարգող Արմինե Սադիկյանը Aravot.am-ին պատմեց, որ մահացածի մորից միայն կարողացել են պարզել, որ. «Սիփանը վիրավոր ժամանակ մոտեցել է կապիտանին ու օգնություն խնդրել: Կապիտանը անմիջապես կանչել է շտապօգնություն եւ ներարկում են արել երեխային: Գիտակցությունը տեղն է եղել, տեղափոխել են վիրահատության:
Ծնողները չեն իմացել, թե որ մասից է կոնկրետ վնասվածք ստացել: Երակն է վնասված եղել ու արյունահոսել է: Ճնշման անկում է նկատվել ու արյունաքամ է եղել»:
Դեպքի մասին Սիփանի հարազատները իմացել են հեռախոսազանգով, հենց ռազմական ինստիտուտից են տեղեկացրել: Դիակը Վանաձոր են տեղափոխել երեկ երեկոյան:
Կարդացեք նաև
Վիճաբանության ու կրակոցի պատճառի մասին սպանվածի ընտանիքը տեղեկություն չունի:
Ա. Սադիկյանի խոսքերով, սպանվածը ապրելիս է եղել մոր, տատիկի ու երկու եղբայրների հետ. «Ապրում են Վանաձորի ծայրամասային թաղամասում գտնվող տնակում: Եղբայրը ծառայում էր ԼՂ զորամասում եւ նոյեմբերին պետք է զորացրվեր: Սոցիալապես շատ ծանր վիճակում են: Տնակը խարխուլ է ու ապրելու համար նորմալ պայմաններ չկան»:
Այսօր դեպքի մանրամասների վերաբերյալ սպանվածի քեռին ու այլ հարազատներ հրաժարվել է խոսել: Չեն խոսել նաեւ մահացածի կուրսանտ ընկերները:
Սիփանի հարազատներին այցելել են Լոռու մարզպետն ու Վանաձորի քաղաքապետը:
Արփինե ՍԻՄՈՆՅԱՆ
