Դիլիջան-Սեւան ավտոմոբիլային թունելի մուտքի մոտ եւ միջպետական ավտոճանապարհի Դիլիջան-Իջեւան հատվածում մոտ 3 տարի առաջ պետբյուջեի միջոցներով կառուցվեցին մի քանի հասարակական զուգարաններ: Դրանք կառուցման օրից թալանվեցին, զուգարանների մեջ եղած սանիտարական տեխնիկան, դռների փականները ջարդվեցին կամ գողացվեցին: Հանրային այդ զուգարաններն ի սկզբանե չեն գործել:
Դիլիջանի ավտոմոբիլային թունելի մուտքի մոտ կառուցված հասարակական զուգարանի դռներից մեկի փականը կոտրված է, այդ դուռը փակ է: Զուգարանի մյուս դուռը բաց է, ավելի ճիշտ՝ կոտրված է, ներսում լի աղտեղություն է:
Դիլիջան-Սեւան թունելի մուտքի մոտ ցուցանակը ազդարարում է, որ դա հին՝ Մետաքսի ճանապարհն է:
Տավուշի մարզի տարածքում հաճախ կարելի է տեսնել, որ միջպետական ճանապարհով երթեւեկողները ավտոմեքենան կանգնեցնում եւ իրենց բնական կարիքները հոգում են հենց ճանապարհի եզրին: Առավել ամաչկոտները հեռանում են ճանապարհից` ռիսկ անելով ընկնել գետերի կիրճը կամ անտառում ինչ-որ պատահարից տուժել:
Կարդացեք նաև
Տավուշի մարզում առկա են զբոսաշրջությունը զարգացնելու լավ նախադրյալներ` շքեղ բնություն, պատմաճարտարապետական գեղեցիկ կոթողներ: Սակայն զբոսաշրջիկները ճանապարհին նաեւ զուգարանից օգտվելու կարիք ունեն:
Ոսկան ՍԱՐԳՍՅԱՆ
