Ազգային ժողովն առաջին ընթերցմամբ ընդունեց «Հեռուստատեսության և ռադիոյի մասին» օրենքում փոփոխություններ կատարելու մասին կառավարության հեղինակած օրինագիծը:
Ըստ այդմ, առաջարկվում է երեք տարով երկարաձգել ռադիոհեռարձակման թվայնացման հետ կապված անցումային դրույթը՝ մինչև 2016 թ.-ի հուլիսի 20-ը:
6 ամսով երկարաձգվում են նաև անալոգային հեռարձակումից թվային հեռարձակման անցնելու, ինչպես նաև մարզային հեռուստաընկերությունների անալոգային լիցենզիաների գործողության ժամկետները՝ 2015 թ.-ի հունվարի մեկից մինչև հուլիսի մեկը:
Գործող օրենքի համաձայն՝ հեռուստահաղորդումների թվային հեռարձակումը գործարկվել է 2010 թ.-ից, իսկ ռադիոհեռարձակման համար նախատեսվել է անցումային ժամանակաշրջան՝ մինչև 2013 թ.-ի հուլիսի 20-ը։ Այս ժամանակահատվածում ռադիոհեռարձակում իրականացնող կազմակերպությունների լիցենզիայի գործողության ժամկետները կարող են երկարաձգվել, ինչպես նաև սահմանվել ռադիոհեռարձակողների լիցենզավորման կարգն ու պայմանները: Ռադիոընկերություններին հնարավորություն է տրվում ՝ մինչև պայմանների ապահովումը, սահմանված ժամկետում շարունակել գործունեությունը իրենց լիցենզիաների պայմաններին համապատասխան։
Կառավարության հիմնավորմամբ, ժամկետների երկարաձգման նախաձեռնությունը Էլեկտրահաղորդակցության միջազգային միությանն է. թվայնացման ժամկետը բոլոր երկրներում երկարաձգվել է մինչև 2015թ.-ի երկրորդ եռամսյակը:
Հեռուստառադիոհեռարձակման թվայնացման ոլորտում ընթացող իրադարձությունների զարգացումը ցույց է տալիս, որ ՀՀ տարածքում ռադիոհեռուստահաղորդումների հեռարձակման թվային համակարգի ներդրումը կապված է տեխնիկական, նյութական և ֆինանսական էական դժվարությունների հետ, որոնք դեռևս անհաղթահարելի են թե պետության, թե հեռարձակողների և թե սպառողների համար։
Ինչպես նշեց հիմնական զեկուցող՝ ՀՀ տրանսպորտի և կապի նախարարի տեղակալ Անդրանիկ Ալեքսանյանը, Հայաստանը պարտավոր է սահմանված ժամկետում թվայնացումն իրականացնել, հակառակ դեպքում՝ իր ունեցած հաճախականությունները կօգտագործեն հարևան երկրները:
«Համոզված եմ՝ մինչև 2015թ.-ի երկրորդ եռամսյակը կհասցնենք: Մինչ այդ ժամկետը թվայինն ու անալոգայինը միասին կաշխատեն, երկրորդ եռամսյակից անալոգայինը կանջատվի»,-նշեց նա:
