ՀՀ կառավարության կողմից ընդունվել է առողջապահական համակարգի ֆինանսավորման նոր հայեցակարգ

ՀՀ կառավարության կողմից ընդունվել է առողջապահական համակարգի ֆինանսավորման նոր հայեցակարգ

ՀՀ ֆինանսների նախարարության աշխատակազմի ֆինանսական վերահսկողության տեսչության կողմից 2012 թվականին իրականացված ստուգումների արդյունքում արձանագրվել է, որ պետության  կողմից երաշխավորված անվճար բժշկական օգնության և սպասարկման շրջանակներում հիվանդանոցային բժշկական օգնության գծով թվով 9-ը ծրագրերով հիվանդներին սնունդ չտրամադրելու պայմաններում,  մեկ հիվանդի բուժման մեկ օրվա ծախսերում (հետևաբար նաև ՀՀ առողջապահության նախարարի հրամաններով հաստատված  մեկ հիվանդի բուժման գներում) ներառվել է նաև սննդի գումար, որի արդյունքում «Հիվանդանոցային ծառայություններ» ծրագրով ավելի է նախատեսվել և հատկացվել շուրջ 513,0 մլն դրամ: Միաժամանակ, առաջարկվել է ՀՀ առողջապահության նախարարությանը «Հիվանդանոցային ծառայություններ» ծրագրով գումարների նախատեսման նպատակով ներկայացված բյուջետային հայտերի հաշվարկներում և ՀՀ առողջապահության նախարարի համապատասխան հրամաններում վերանայել մեկ հիվանդի բուժման մեկ օրվա արժեքը և այն հիվանդությունները, որոնց գծով հիվանդներին սննդի տրամադրումը պարտադիր չէ (և չի հատկացվում) մեկ հիվանդի բուժման գինը նվազեցնել սննդի ծախսերի չափով:

Պետության կողմից երաշխավորված անվճար հիվանդանոցային ծառայությունների ձեռք բերման ամենամյա բյուջետային հայտերի և բուժման գների ձևավորումը 1997 թվականից մինչև 2013 թվականը իրականացվում է ՀՀ առողջապահության նախարարության և ՀՀ ֆինանսների նախարարության միջև համաձայնեցված մեթոդաբանությամբ, որի համաձայն ըստ ծրագրերի բյուջետային միջոցները որոշվում են հիվանդների թվաքանակի և մեկ հիվանդի բուժման միջին գնի արտադրյալով: Իսկ բյուջեով նախատեսված մեկ հիվանդի բուժման միջին գինը հաշարկվում է բուժման միջին տևողության, բուժման բարդության գործակցի և բյուջեով նախատեսված բուժման մեկ օրվա միջին գնի արտադրյալով: Բյուջեով նախատեսված մեկ հիվանդի մեկ օրվա միջին ծախսերում ներառված են հիվանդի բուժման համար անհրաժեշտ բոլոր ծախսերը, այդ թվում և սննդի ծախսեր (մեկ օրվա համար 296 դրամ): Բուժման մեկ հիվանդ/օրվա միջին գինը ընդհանուր է բոլոր ծառայությունների բուժման գների հաշվարկման համար, իսկ ըստ ծառայությունների բուժման գները ձևավորվում են այդ ծառայությունների բուժման տևողությունների և բուժման բարդության գործակիցների կիրառման միջոցով: Բարդության գործակիցների կիրառմամբ կանոնակարգվում է տվյալ ծառայության մատուցման համար անհրաժեշտ ծախսերի կառուցվածքը և մեծությունը՝ այդ թվում նաև սննդի տրամադրման անհրաժեշտությունը: Այս մեթոդաբանության հիման վրա կազմված բուժման գները հաստատվում են ՀՀ առողջապահության նախարարի հրամանով, որը ներկայացվում է ՀՀ ֆինանսների նախարարի համաձայնեցմանը, իսկ բուժման ընթացքում հիվանդներին սննդով պարտադիր ապահովող ծառայությունների ցանկը հաստատվում է ՀՀ առողջապահության նախարարի հրամանով: 2012 թվականի բյուջետային հայտի հիվանդանոցային ծառայության ընդհանուր ծախսերում սննդի ծախսերը նախատեսվել են շուրջ 600.0 մլն  դրամ, որը ամբողջությամբ ծախսվել է միայն ՀՀ առողջապահության նախարարի հրամանով հաստատված սնունդ տրամադրող ծառայությունների կողմից:

Նշված հարցի հստակեցման նպատակով, մեկ հիվանդի մեկ օրվա բուժման ծախսերի տարրերն առավել հավաստի հաշվարկելու նպատակով կատարվել են մի շարք առողջապահական ընկերությունների փաստացի ծախսերի ուսումնասիրություններ և, հիմք ընդունելով ֆինանսական վերահսկողության տեսչության առաջարկները, ՀՀ առողջապահության նախարարի հրամանով սահմանվել է հիվանդանոցային բուժօգնության մեկ հիվանդի բուժման մեկ օրվա միջին ծախսերի կողմնորոշիչ չափաքանակներ սնունդ տրամադրող և սնունդ չտրամադրող ծառայությունների համար առանձնացված:

ՀՀ կառավարության կողմից ընդունվել է առողջապահական համակարգի ֆինանսավորման նոր հայեցակարգ, որի հիման վրա նախապատրաստվում է ֆինանսավորման նոր կարգի ՀՀ կառավարության որոշման նախագիծ, ըստ որի կկանոնակարգվեն առողջապահական ծառայությունների ծախսերի հաշվարկման, գնագոյացման և ֆինանսավորման հիմնական սկզբունքները:

 

ՀՀ առողջապահության նախարարություն

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք