«Իջեւանատուն» համալիրը քանդվում է

«Իջեւանատուն» համալիրը քանդվում է

Իջեւանի պատմաերկրագիտական թանգարանին կից գտնվող, խորհրդային տարիներից կիսակառույց «Իջեւանատուն» համալիրի շինությունները անմխիթար վիճակում են: Համալիրը պետք է դառնար ժողովրդական արհեստների կենտրոն: Անավարտ համալիրի շինությունները կորել են մոշու եւ այլ թփերի մեջ, դրանց պատերը տարիների ընթացքում անձրեւներից, քամուց խարխլվել են:

2010 թվականի սեպտեմբերի 30-ին Իջեւանում, Տավուշի մարզպետարանում կայացավ ՀՀ կառավարության արտագնա նիստ: Նիստում, ի թիվս այլ հարցերի, կառավարության հավանությանն արժանացավ Տավուշի մարզի մշակութային հիմնախնդիրների լուծմանն ուղղված միջոցառումների ցանկը, ուր ընդգրկված էին վանական համալիրների, թանգարանների, գրադարանների, մշակույթի տների նորոգման կամ վերականգնման ծրագրեր: Կառավարությունն արտագնա նիստում հավանություն տվեց քանդակի Իջեւանի սիմպոզիումի վերականգնման ծրագիր -առաջարկին:

Իջեւանի սիմպոզիումը սկիզբ է առել 1985 թվականին եւ շարունակվել մինչեւ 1991 թվականը: Այդ ընթացքում դրան մասնակցել է 20 երկրի 95 քանդակագործ: Այդ սիմպոզիումների ընթացքում կերտված քանդակները մշակութային շուք են տալիս Իջեւանի քաղաքային զբոսայգուն:

Կառավարության արտագնա նիստում հայտարարվեց, որ քանդակի Իջեւանի սիմպոզիումը կվերականգնվի 2011 թվականին, Իջեւանի պատմաերկրագիտական թանգարանին կից, խորհրդային տարիներից կիսակառույց «Իջեւանատուն» համալիրը կհանձնվի «Փյունիկ» բարեգործական հիմնադրամին՝ այնտեղ քանդակի սիմպոզիումների ավանդույթը վերականգնելու համար:

Գրեթե 3 տարի է անցել կառավարության արտագնա նիստից, քանդակի Իջեւանի սիմպոզիումը չի վերականգնվել, «Իջեւանատուն» կիսակառույց համալիրը չի հանձնվել «Փյունիկ» բարեգործական հիմնադրամին:

Իջեւանի քաղաքապետարանից տեղեկացանք, որ համալիրը գտնվում է պետական գույքի կառավարման վարչության հաշվեկշռում:

Ոսկան ՍԱՐԳՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք