Այսօր գիշերը ժամը 2-ի սահմաններում 22-ամյա Արմինե Ալիխանյանը կտրված թեւով, ծայրահեղ ծանր վիճակում շտապօգնության մեքենայով Իջեւանի հիվանդանոցից տեղափոխվել է համալսարանական թիվ 1-ին հիվանդանոց: Պլաստիկ վիրաբուժության եւ միկրովիրաբուժության կլինիկայի ղեկավար, վիրաբույժ Արտավազդ Սահակյանի եւ տրավմոտոլոգների համատեղ ջանքերով հաջողվել է Արմինեի պոկված ձեռքը վերականգնել:
Ծանր վիրահատությունից մի քանի ժամ անց Aravot.am-ի հետ զրույցում Արտավազդ Սահակյանն ասաց, որ «կրիտիկական» պահն արդեն անցել է եւ աղջկա մոտ արյան շրջանառությունն արդեն նորմալացել է:
Բժիշկը պատմեց, որ Արմինեի ձեռքը վնասվել է երեկ գիշերը Իջեւան-Նոյեմբերյան ճանապարհին, Սարի գյուղի հատվածում տեղի ունեցած վթարի արդյունքում: Բժիշկ Սահակյանի խոսքերով. «Արմինեի աջ ձեռքը, ամբողջ ուսագոտին ջնջխված էր, բազմաթիվ կոտրվածքներ ուներ անրակին, բազկոսկրին ինչպես նաեւ ծղիկ ոսկրին եւ ճաճանչոսկրին, արմունկային հոդի շրջանում նույնպես վնասվածք կար: Որտեղից էլ ձեռքը ամբողջությամբ պոկվել էր»:
Արտավազդ Սահակյանը նաեւ պատմեց, որ հիվանդանոց հասցնելուց երկուսուկես ժամ հետո արյան շրջանառությունը վերականգնվել էր:
Կարդացեք նաև
Հիվանդն արդեն գտնվում է վերակենդանացման բաժանմունքում եւ, ըստ բժշկի՝ վիճակը կայուն ծանր է:
Այսօր գիշեր հերթապահել է բժիշկների այն թիմը, որը մոտ 20 օր առաջ նույնպիսի բարդ վիրահատություն էր կատարել եւ կպցրել ավտովթարից տուժած մեկ այլ աղջկա՝ Լիլիթի ոտքը, որը հիվանդանոց էր տեղափոխվել Վայքից:
«Լիլիթը լավ է, բաժանմունքում է դեռ եւ բուժումը շարունակում է»,-մեզ հետ զրույցում ասաց բժիշկ Սահակյանը:
Լուսինե ԲՈՒԴԱՂՅԱՆ
Հարգելի Արտավազդ, որպես հայ մարդ գոհունակությունս չեմ կարող չարտահայտել՝ հպարտ եմ քեզանով և երկար տարիների կյանք եմ մաղթում Ձեզ:Միանում եմ հարազատներին և ասում՝ ՇՆՈՐՀԱԿԱԼՈՒԹՅՈՒՆ…
Ազգային հարստությունը առաջին հերթին դա ազգի նվիրյալներն են, հետո հող, գործարան և այլն: Արտավազդին համարում եմ նվիրյալ: Նա և լավ բժիշկ է, և լավ ու ազնիվ անձնավորություն: